Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 299 Hüküm no: 345 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hüseyin b. Abdurrahman’ın varislerinden oğlu Hasan’ın, terekeden bazı eşya ve hayvanları zaptettiği iddiasıyla Mehmed b. Mustafa’ya açtığı davayı ispat edemediği Ma‘rûz Anadolu’da Devrek kazâsına tâbi‘ Debbağlar karyesi sâkinlerinden iken bundan akdem vefât eden Hüseyin b. Abdurrahman’ın verâseti zevce-i metrûkesi Kerîme bt. ( ) nâm hatun ile sulbî kebîr oğulları Halil ve Hüseyin ve İbrahim ve Hasan’a ve sulbiye kebîre kızları Alime ve Âişe nâm hatunlara ba‘de’l-inhisâr tashîh-i meseleleri seksen sehimden olup sihâm-ı mezkûreden on sehmi zevce-i mezbûre Kerîme’ye ve on dörder sehmi oğulları mezbûrûn Halil ve Hüseyin ve İbrahim ve Hasan’dan herbirine ve yedişer sehmi kızları mezbûretân Alime ve Âişe’den herbirine isâbeti tahakkukundan sonra derûn-ı arzuhâlde mezkûr mezbûr Hasan Bâ[b] Mahkemesi’nde meclis-i şer‘de sahib-i arzuhâl Mehmed b. Mustafa muvâcehesinde babam müteveffâ-yı mezbûrun terekesinden mecmû‘u yüz otuz altı guruş kıymetli eşyâ ile bir Mushaf-ı şerîf ve bir çift manda öküzü ve beş kara sığır ineği ma‘a buzağı ve bir kebîr kazgan ve iki pekmez tâbesi ve bir sini ve bir bakrac ve dört tencere ve on sahan ve bir tüfengi mezbûr Mehmed bi-gayr-ı hakkın ahz u kabz etmekle tereke-i mezkûrenin aynıları mevcûd ise aynılarını müstehlek ise kıymet-i şer‘iyelerinden tas[h]îh-i mezkûr üzere benim hisseme isâbet eden yirmi üç guruş otuz üç para hakkımı mezbûr Mehmed’den taleb ederim deyü ba‘de’d-da‘vâ ve’l-inkâr müdde‘î-i mezbûr Hasan ber-vech-i muharrer müdde‘âsını beyâna kādir olmayıp tahlîfe dahi tâlib olmamağla mezbûr Hasan bilâ-beyyine bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 17 Ş sene 1162