Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 300 Hüküm no: 346 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şekerci esnafının nizama aykırı olarak şerbetçilere mahsus yiyecek ve içecekleri yapıp satmaktan menedildikleri Bâ-mühr-i hazret-i efendi Ma‘rûz İstanbul’da vâki‘ şerbetçi esnâfının kethudâları el-Hâc Feyzullah ve ustalarından Molla Hüseyin ve el-Hâc Mehmed ve Yahûdilerden İlya ve Abraham ve Yasef ve Yako ve sâir müseccelü’l-esâmî Müslim ve Yahûd ustalarından otuz nefer kimesneler dîvân-ı âlîlerinde ma‘kūd meclis-i şer‘a kapıkethudâsı ( ) mübâşeretiyle ihzâr ettirdikleri mahmiye-i mezbûrede vâki‘ şekerci esnâfının kethudâları el-Hâc Ali ve yiğitbaşıları Mehmed Çelebi ve ustalarından Ali Çelebi ve İsmail Çelebi ve el-Hâc Süleyman ve sâir kezâlik müseccelü’l-esâmî on nefer kimesneler muvâcehelerinde işbu şekerci esnâfına ancak akide ve peynir şekeri mahsûs olup bizim esnâfımıza dahi envâ‘-ı eşribe ve reçel ve şekerleme ve gül-be-şeker ve râhatü’l-hulkūm ve kutu nebât mahsûs olup herbirimiz âharın emti‘asını işlemek ve bey‘ ve şirâ etmek nizâm-ı kadîmimize muhâlif ve memnû‘ iken ve bi’d-defa‘ât herbirimiz âharın emti‘asına müdâhale etmemek üzere tenbîhi hâvî senedât-ı mer‘iyye ve emr-i âlîşân sâdır olmuş iken şekerci esnâfı râhatü’l-hulkūm ile kutu nebât dahi bizimdir deyü ısrar ve bu bahâne ile sâir emti‘amıza dahi taarruz etmeleriyle müddet-i medîdeden beri beynimizde münâza‘ât-ı kesîre vâkı‘a olup tavassut-ı muslihîn ile bizler şekerci esnâfının akide ve peynir şekerinden mâ‘adâ râhatü’l-hulkūmu dahi işleyip ve bey‘ edip ve kutu nebâtı dahi bizden iştirâ ve bey‘ etmelerine râzı olduğumuzda onlar dahi ba‘de’l-yevm bu dört nevi‘den gayri envâ‘-ı eşribe ve reçel ve şekerleme ve gül-be-şekeri kat‘a işlemeyip ve bey‘ ve şirâ etmemek üzere herbiri müte‘ahhid olup bu vechile kat‘-ı nizâ‘ ve kıbel-i şer‘den yedimize hüccet-i şer‘iye i‘tâ ve mûcebince emr-i âlî sâdır olmuş iken yine mezbûrûn mütenebbih olmayıp hilâf-ı nizâm bize mahsûs olan emti‘ayı işleyip ve bey‘ ederler deyü teşekkî eylediklerinde mezbûrûn şekerci esnâfı dahi ber-vech-i muharrer ta‘ahhüdleri ve nizâmlarını ve mezâmîn-i senedâtı ve kendilerden bazıların hilâf-ı nizâm hareketini ikrâr etmeleriyle fîmâ-ba‘d nizâm-ı mezkûra ve emr-i âlîye muhâlif hareket eder olur ise tedîben dükkânı sed ve kendi san‘atından tard ve ib‘âd olunacağı herbirine tefhîm ile hilâf-ı nizâm-ı mezkûr hareket etmemek üzere tenbîh-i ekîd olunduğu huzûr-ı âlîlerine i‘lâm olundu bâkī emr ü fermân hazret-i veliyyü’l-emrindir. Fî 17 min-Şa‘bâni’l-mu‘azzam sene 1162