Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 301 Hüküm no: 347 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oturakçı esnafının, yorgancılara mahsus olan yün mamüllerini işleyip satmakdan menedildikleri Bâ-mühr-i hazret-i efendi Ma‘rûz Ashâb-ı arzuhâl yorgancı esnâfının kethudâları el-Hâc Mehmed ve yiğitbaşıları Yahya Çelebi ve ustalarından el-Hâc Mehmed ve Mustafa Çelebi ve el-Hâc Süleyman ve el-Hâc İbrahim ve es-Seyyid Abdülgani ve el-Hâc Ahmed ve el-Hâc Mustafa [ve] el-Hâc Ömer ve diğer el-Hâc İbrahim ve el-Hâc Yusuf ve el-Hâc Memiş ve sâirleri meclis-i şer‘de Aksaray Sûku’nda vâki‘ oturakçıların kethudâları Mehmed Çelebi ve Mustafa Çelebi ve Mehmed Bey ve diğer Mustafa ve el-Hâc Hasan ve Ahmed ve Molla Abdurrahman ve Halil Beşe ve Hüseyin Odabaşı ve Karaman-ı Küçük’de olan oturakçılardan Hüseyin Çelebi ve el-Hâc Hüseyin ve diğer Hüseyin ve Davudpaşa kurbünde Yenifırın nâm mahâlde olan oturakçılar Ebûbekir Çelebi ve Ruhavî el-Hâc İbrahim ve Hızır oğlu Osman ve sâirleri muvâcehelerinde ez-kadîm nizâmımız yün döküp ve dikip ve döğülmüş yün satmak ve cedîd yasdık ve cedîd keçe ve kaliçe ve cedîd yorgan bey‘ etmek bize mahsûs bizim metâ‘ımız olup Bitpazarı ve Aksaray ve sâir mahallerde olan oturakçılar kadîmden eski kebe ve eski keçe ve sâir eski eşyâ ve emti‘a bey‘ edegelip mukaddemâ bi’d-defa‘ât döğülmüş yün ve sâir yorgancılara mahsûs emti‘aya karışmakdan ve bey‘den bâ-fermân-ı âlî memnû‘lar iken işbu mezbûrûndan bazıları hilâf-ı emr-i âlî ve mugāyir-i nizâm-ı kadîm döğülmüş yün satıp ve bozup ve büküp ve sâir yorgancı emti‘asını bey‘ ve şirâ etmeleriyle külliyyen nizâm-ı kadîmimizin ihtilâline bâdî olmuşlardır deyü min-külli’l-vücûh takrîrlerine mutâbık emr-i âlîşân ve hüccet-i şer‘iye ve i‘lâm-ı müte‘addide ibrâz ile ba‘de’t-teşekkî ve’s-suâl oturakçı tâifesinden olan mezbûrûndan dahi nizâm-ı kadîmleri minvâl-i muharrer üzere olduğunu ve mazmûn-ı emr-i âlîşân ve senedât-ı mer‘iyyeyi mukır [45a] ve mu‘terif olmalarıyla fîmâ-ba‘d döğülmüş yün bey‘ ve şirâ etmeyip ve büzmeyip ve dökmeyip ve sâir yorgancı emti‘asına hilâf-ı kadîm ve mugāyir-i emr-i âlî bir vechile dahl ü ta‘arruz etmeyip ve karışmamak üzere mezbûrûn oturakçılara tenbîh-i ekîd olundukda onlar dahi kadîmî nizâmları üzere hareket edip hilâf-ı kadîm ve mugāyir-i emr-i âlî yorgancı emti‘asına müdâhale etmemek üzere ta‘ahhüd eyledikleri ba‘de’t-tescîl huzûr-ı âlîlerine i‘lâm olundu. Fî 18 min-Şa‘bân sene 1162