Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 302 Hüküm no: 349 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gül’ün anne ve babasından intikal eden evdeki hissesini zapteden abisi Terzi Arotin’in müdahaleden menedildiği Ma‘rûz Arzuhâlde mezkûr Koca Mustafa Paşa mahallesi mütemekkinler müte‘âkiben hâlikân olan Avadik [ve] zevcesi İva zimmîlerin verâsetleri sulbî kebîr oğulları Derzi Arotin ve Filiboz ve Azarya ve Ananya ve Serkiz ve kebîre kızı Gül Nasrânîlere ba‘de tahakkukı’l-inhisâr mesfûre Gül Nasrâniye ba‘de’t-ta‘rîfi’ş-şer‘î meclis-i şer‘-i enverde tereke-i hâlikân-ı mesfûrândan mevrûs mahalle-i mezkûrede vâki‘ bir tarafdan Ayvaz zimmî menzili ve bir tarafdan Zakarya zimmî menzili ve bir tarafdan tarîk-ı hâs ve bir tarafdan tarîk-ı âm ile mahdûd fevkānî ve tahtânî sekiz bâb oda ve bir sofa ve bir bi’r-i mâ ve havluyu hâvî menzilin on bir sehimden bir sehmi benim hakk-ı mevrûsum iken zabtıma mâni‘ olur sehm-i mezkûrundan kasr-ı yedine tenbîh taleb ederim deyü ba‘de’d-da‘vâ ve’s-suâl merkūm Derzi Ar[u]tin cevâbında fi’l-vâki‘ menzil-i mahdûd-ı mezkûrdan on sehimden bir sehmi müdde‘iye-i mesfûrenin ebevânı hâlikân-ı mesfûrândan mevrûs mülkü olduğunu ikrâr ve i‘tirâf etmeğin alâ-mûceb-i i‘tirâfihî müdde‘iye-i mezbûrenin menzil-i mahdûd-ı mezkûrdan on bir sehimden bir sehm-i mevrûsundan kasr-ı yed ile mesfûr Derzi Arotin zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 18 Ş sene 1162