Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 303 Hüküm no: 350 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Süleyman’ın odasından çalınan eşyalarını elinde bulunduran Abdurrahman Beşe’nin eşyaları teslim etmesi Ma‘rûz Mumcu Abdi Beşe mübâşeretiyle Bâb Mahkemesi’ne ihzâr olunan Koltukçu Abdurrahman Beşe’nin hasmı el-Hâc Süleyman meclis-i şer‘-i hatîrde mezbûr Abdurrahman Beşe mahzarında eşyâ-i memlûkemden işbu mu‘âyene olunan bir sarı sûzenî işleme kaba şal anteri ve iki turuncu sûzenî işleme kaba şal anterilerim târih-i i‘lâmdan elli altı gün mukaddem Acıçeşme kurbünde sâkin olduğum hâne odasından zâyi‘ olmuşidi hâlâ mezbûr Abdurrahman Beşe yedinde buldum bi’l-istihkāk taleb ederim deyü ba‘de’d-da‘vâ ve’s-suâl mezbûr Abdurrahman Beşe cevâbında zikrolunan anterileri gāib ani’l-meclis Salamon nâm Yahûdî’den yirmi dokuz guruş otuz iki para semen-i medfû‘ ve makbûza iştirâ edip mülk-i müşterâsı olmak üzere vaz‘-ı yedini ikrâr lâkin müdde‘î-i mezbûrun mülkü olduğunu inkâr etmeğin müdde‘î-i mezbûr ber-vech-i muharrer müdde‘âsını lede’t-tezkiye adâletleri zâhir olan el-Hâc Halil b. Mehmed ve diğer el-Hâc Halil b. Ahmed ve İsmail b. Abdullah nâm kimesneler şehâdetleriyle mezbûr Abdurrahman Beşe muvâcehesinde vech-i şer‘î üzere ba‘de’l-isbât ve’t-tahlîf mûcebiyle zikrolunan üç aded anterileri müdde‘î-i mezbûr el-Hâc Süleyman’a [teslîme] merkūm Abdullah Beşe’ye tenbîh olunduğu huzûr-ı âlîlerine i‘lâm olundu. Fî 21 min-Şa‘bâni’l-mu‘azzam sene 1162