Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 60 Hüküm no: 22 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mucur kazasının Göynük köyünde bulunan Mustafa b. Selim’in yaptırdığı caminin imamet ve hitabet cihetinin Hacı Hasan Halîfe b. Memiş’e tevcihi Ma‘rûz, Hacı Bektaş ma‘a-Mucur kazâsına tâbi‘ Göynük nâm karyede vâki‘ Mustafa b. Selim nâm sahibü’l-hayrın binâ eylediği câmi‘-i şerîfde yevmî bir akçe vazîfe ile imâmet ve hitâbet cihetleri Abdülhalim b. Ahmed’in üzerinde olduğu askerî rûznâmçesinden derkenâr olunmağla inhâ ve derkenâra nazaran muktezâsı i‘lâm olunmak bâbında sâdır olan fermân-ı âlîşâna imtisâlen ciheteyn-i mezkûreteyn mutasarrıfı olduğu karye-i mezbûre ahâlîsinden bu esnâda Der-aliyye’ye gelen bî-garaz erbâb-ı vukūfdan Şahmanoğlu Hasan b. İsmail ve Küçükoğlu Halil b. Ömer nâm kimesnelerin bi’l-muvâcehe alâ-tarîkı’ş-şehâde ihbârlarıyla zâhir olan mezbûr es-Seyyid Abdülhalim meclis-i şer‘-i münîrde derûn-ı arzuhâlde ismi mezkûr el-Hâc Hasan Halîfe b. Memiş nâm kimesne mahzarında takrîr-i kelâm edip ben ber-vech-i muharrer mutasarrıf olduğum ciheteyn-i mezkûreteyni hüsn-i rızâ ve tayyib-i hâtırımla merkūm el-Hâc Hasan Halîfe’ye kasr-ı yed ve yedimde olan atîk beratımı huzûr-ı şer‘de merkūma teslîm etmemle kasr-ı yedimden tevcîh buyurulması niyâzımdır deyü istid‘â ve mezbûrun ehliyet ve istihkākı lede’l-imtihân zâhir ve hüveydâ olmağla bu sûretde ciheteyn-i mezkûreteyn merkūm es-Seyyid Abdülhalim’in kasr-ı yedinden bi’n-nefs varıp edâ-yı hizmet etmek şartıyla mezbûr el-Hâc Hasan Halîfe’ye tevcîh ve atîk beratı kaleminde battala hıfz olunarak yedine müceddeden berat-ı âlîşân i‘tâsı bâbında emr ü fermân hazret-i men-lehu’l-emrindir. Fî 15 M sene [12]48