Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 61 Hüküm no: 23 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya’nın Taşâbad kazası Değirmenli köyünün Sultan Hatun Vakfı’na mı yoksa Hanım Hatun Vakfı’na mı ait olduğunun tespiti Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Amasya sancağında Taşâbad kazâsına tâbi‘ Değirmenli karyesi vakfında Defter-i hâkānî kaydı Sultan Hatun ve berat kaydı Hanım Hatun lafzıyla muharrer olduğundan münâza‘a vukū‘ bulduğuna binâen müdde‘î ve müdde‘â-aleyh mahâllinde meclis-i şer‘de muvâcehe olunup zikrolunan Değirmenli karyesi bu âna kadar kangı vakıf tarafından zabt ve tasarruf olunagelmişdir ve Sultân Hatun Vakfı’na Hanım Hatun Vakfı dahi ıtlâk olunagelmiş midir ve te‘âmül-i kadîm ne vechiledir ehl-i vukūfdan gereği gibi etrâfıyla tahkīk ve tarafeyn gadr ve himâyeden ârî olarak ber-nehc-i şer‘î terâfu‘ birle hakīkati alâ-vechi’s-sıhha Der-aliyye’ye i‘lâm olunmak bâbında Anadolu kādıasker-i esbak i‘lâmıyla iki yüz otuz beş senesi Saferü’nde emr-i âlî sâdır oldukdan sonra ve vakf-ı mezkûr arâzî ve hâsılâtının ber-mûceb-i Defter-i hâkānî mahallerinde zabtı bâbında defter emîni sâbık arzıyla iki yüz kırk dört senesi Şevval’inde dahi diğer emr-i âlî sâdır olduğu meâl-i kuyûddan müstebân ve emr-i sâbık-ı mezkûr muhterik olduğu beyânıyla kaydı mûcebince emr-i âlîşân ısdârı istid‘â olunduğu meâl-i arzuhâlden müstefâd ve nümâyân olmağın bu sûretde emr-i mezkûrun mahâlline vusûlüyle zımnında bir gûne cevâb vârid ve kaydı bâlâsına şerh verilmiş olduğundan keyfiyeti ma‘lûm <> olunamamağla eğer emr-i mezkûr mahâlline vürûd ile mürâfa‘a ve zımnında hükm-i şer‘î lâhık olmuş ise müntakız olmayacağı ma‘lûm-ı devletleri buyruldukda işbu emr-i âlîşâna binâen istînaf olunmayıp eğer henüz terâfu‘-i şer‘-i şerîf olunmamış ise <> kadîmî vechile zabtı lâzım gelmekle tarafeyni bi’l-muvâcehe şer‘an mürâfa‘a [ve] hakīkat-i hâli Der-aliyye’ye i‘lâm olunmak bâbında emreyn-i mezkûreyn meâlleri derciyle müceddeden emr-i âlîşân ısdârı muvâfık-ı irâde-i seniyyeleri olur ise ol bâbda emr [ü] fermân hazret-i veliyyü’l-emrindir. Fî 3 S sene [12]48