Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 304 Hüküm no: 351 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Ömer Efendi’nin Sarraf Sahak v. Serkiz ve ortağı Agop v. Artin ile olan alacak-verecek davasında sulh olup birbirlerinin zimmetlerini ibra ettikleri Bâ-mühr-i hazret-i efendi Ma‘rûz Sipâh ocağı şâkirdlerinden arzuhâlde mezkûrü’l-ism Mehmed Efendi b. Ömer Efendi meclis-i şer‘de sahibân-ı arzuhâl Sarrâf Sahak v. Serkiz ve şerîki Agop v. Artin nâm zimmîler hazırlar oldukları hâlde bin yüz elli senesi Rebî‘ülevvel’inden işbu târih-i i‘lâm şehrinin dokuzuncu gününe gelince işbu mesfûr Sarrâf Sahak zimmîye malından ve yedinden bi’d-defa‘ât istikrâz ve kabz ve istihlâk ve yine bi’d-defa‘ât kendiye edâ ve teslîm eylediğim kırk sekiz bin dört yüz doksan yedi guruş için benden bilâ-devr-i şer‘î izdiyâd aldığı beş bin sekiz yüz elli bir buçuk guruş olup [alıp] hatta on gün mukaddem benim Ma‘cûnî Kasım mahallesinde vâki‘ menzilimde huzûr-ı Müslimînde benden bilâ-devr-i şer‘î ribh olmak üzere ol mikdâr guruşu aldığını ikrâr dahi edip ve benim hâlâ zimmetimde mesfûr Sarrâf Sahak’a iki bin üç yüz seksen guruş deynim olmağın bilâ-devr benden aldığı meblağ-ı mezkûrdan mikdâr-ı deyn-i mezbûrum ba‘de’t-takās bâkī mesfûrun zimmetinde kalan üç bin dört yüz altmış beş buçuk guruşu taleb ederim deyü ben işbu târih-i i‘lâm şehrinin dokuzuncu günü merkūm Sarrâf Sahak zimmîden huzûr-ı şer‘de da‘vâ eylediğimde ol dahi benim zimmetimde olan iki bin üç yüz seksen altı guruş hakkını benden taleb ve benden bilâ-devr-i şer‘î beş bin sekiz yüz elli bir buçuk guruş ribh aldığını ve ikrârını inkâr ettikde ben müdde‘âmı mesfûr muvâcehesinde şühûd-ı udûl ile ba‘de’l-isbât ve’l-hükm deyn-i mezkûrum ba‘de’t-takās bâkī üç bin dört yüz altmış beş buçuk guruşu bana red ve teslîme merkūm Sahak’a tenbîh ve yedime Mahkeme-i Bâb’dan i‘lâm verilmişidi el-hâletü hâzihî beynimize muslihûn tavassut edip beni merkūm Sahak’dan üç bin dört yüz altmış beş buçuk guruş mutâlebesinden yüz guruş bedel-i makbûza sulh eylediklerinde ben dahi sulh-ı mezkûru kabûl edip bâkī üç bin üç yüz altmış beş guruş mutâlebesinden ve sâir ibtidâ-i ahz u i‘tâmızdan târih-i i‘lâma gelince beynimizde cereyân eden mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan mesfûr Sahak’ın şerîki işbu Agop’un herbirinin zimmetini ibrâ-i âm ile ibrâ ve ıskāt eylediğimde onlar dahi herbiri benim zimmetimde olan iki bin üç yüz seksen altı guruş bedel olmak üzere medfû‘u olan yüz guruş mutâlebelerinden ve kezâlik târih-i kitâba gelince cereyân eden mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan benim zimmetimi ibrâ-i âm ile ibrâ ve ıskāt edip ve herbirimiz âharın ibrâsını kabûl eyledik ba‘de’l-yevm herbirimiz âhar ile vechen mine’l-vücûh ve sebeben mine’l-esbâb kat‘a da‘vâ ve nizâ‘ ve husûmetimiz yokdur dediğini mesfûr Sarrâf Sahak ve şerîki Agop tasdîk edip bu vechile kat‘-ı nizâ‘ eyledikleri ba‘de’t-tescîl huzûr-ı âlîlerine i‘lâm olundu. Fî 22 Şa‘bân sene 1162