Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 306 Hüküm no: 354 Orijinal metin no: [45b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. İbrahim’in, boşandığı kocası Mehmed b. İbrahim’de mehir ve nafaka bedeli alacağı olduğu iddiasıyla açtığı davayı ispat edemediği Ma‘rûz Muhzır Hacı Süleyman mübâşeretiyle Bâb Mahkemesi’ne ihzâr olunan Mehmed b. İbrahim’in hasmı ve zevce-i mutallakası Sâliha bt. İbrahim nâm hatun zâtı ba‘de’t-ta‘rîfi’ş-şer‘î meclis-i şer‘-i hatîrde mezbûr Mehmed muvâcehesinde mezbûr Mehmed zevcim olup târih-i i‘lâmdan sekiz ay mukaddem zimmetinde mütekarrer ve ma‘kūdün-aleyh olan dört bin beş yüz akçe mehr-i müeccelim üzerine hul‘ olmak üzere darb-ı şedîd ile bana kerh etmekle ben dahi mükreheten muhâla‘a olmuşidim ancak kerhle olan hul‘da talâk-ı bâin vâki‘ mehrim sâkıta olmamağla taleb ederim deyü ba‘de’d-da‘vâ ve’s-suâl mezbûr Mehmed cevâbında fi’l-vâki‘ müdde‘iye-i mezbûreyi târih-i mezkûrda ancak iki yüz akçe mehr-i müeccel müsemmâ ile zevce-i menkûhası iken mehr-i mezkûru ve nafaka-i iddet-i ma‘lûmesi ve meûnet-i süknâsı kendi üzerine olmak üzere muhâla‘a ve hukūk-ı zevciyete müte‘allika da‘vâdan herbiri âharın zimmetini ibrâlarını ikrâr lâkin müdde‘iye-i mezbûrenin mehr-i müsemmâsı iki yüz akçeden ziyâde olduğunu ve ber-vech-i muharrer olan hul‘da [46a] kerh eylediğini inkâr etmeğin müdde‘iye-i mezbûre ber-minvâl-i muharrer müdde‘âsını beyâna kādire olamayıp talebiyle mezbûr Mehmed’e vech-i şer‘î üzere yemîn verilmeğin mûcebince müdde‘iye-i mezbûre Sâliha Hatun bilâ-beyyine bî-vech mu‘ârazadan men‘ olunduğu huzûr-ı âlîlerine i‘lâm olundu el-emrü li-men-lehu’l-emr. Fî 24 min-Şa‘bân sene 1162