Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 306 Hüküm no: 355 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşçı Hasan Beşe b. Ali ile ortakları Yusuf ve Mehmed’in, getirdikleri taşı esnafa dağıtan taşcıbaşı ve mimar ağaya açtıkları davadan vazgeçip bundan sonra getirecekleri taşı onların dağıtmasına razı oldukları Bâ-mühr-i hazret-i efendi Ma‘rûz Taşçı tâifesinden ashâb-ı arzuhâl Hasan Beşe b. Ali ve şerîki Yusuf ve Mehmed b. Hasan nâm kimesneler dîvân-ı âlîlerinde ma‘kūd meclis-i şer‘de Taşçıbaşı İbrahim Çelebi ve kethudâları el-Hâc Abdullah ve ustalarından Derviş İbrahim ve el-Hâc Ali ve Usta Hasan ve Abdi Odabaşı ve es-Seyyid Mehmed ve es-Seyyid Abdülkerim ve Mustafa Çelebi ve Abdi ve Ali Usta ve sâirleri mi‘mâr ağa kulları tarafından Hüseyin Halîfe ve Ali Halîfe hazırlar oldukları hâlde biz taşçı ustalarından olup Balatkapısı hâricinde dükkânımız olmağla kendi malımız ile Marmara ma‘deninden bir kayık taş getirip dükkânımızda işlemek üzere ihrâc ve dükkânımıza vaz‘ murâd eylediğimizde işbu taşçıbaşı ve kethudâmız ve ustalarımız mi‘mâr ağa ma‘rifetiyle getirdiğimiz taşı nizâm-ı kadîm üzere cümleye tevzî‘ eylediklerinde bizler râzı olmayıp malımızı istirdâd ederiz deyü da‘vâya tesâddî etmişidik onlar dahi taşçı ustalarının ma‘denden taş getirmeleri bâ-fermân-ı âlî memnû‘dur ancak taş getirmek tüccâra mahsûsdur ve onlar dahi getirdikleri taşı münâvebe ile iskelelere taksîm ve ustalarımıza mi‘mâr ağa ma‘rifetiyle tevzî‘ ederler ve bizim hirfetimiz erbâbına mîrî taşçıbaşını ve bostânî karışmak bâ-fermân-ı âlî memnû‘dur ez-kadîm nizâmımız bu minvâl üzeredir binâenaleyh taşlarınızı mi‘mâr ağa ma‘rifetiyle nizâm-ı kadîmimiz üzere tevzî‘ eyledik dediklerinde beynimizde ba‘de’l-münâza‘âti’l-kesîre nizâm-ı kadîmimiz ustalarımızın takrîrleri üzere olmağın biz dahi da‘vâ-yı mezkûremizden fâriğ olup mezbûrların ber-mûceb-i nizâm-ı kadîm taşımızı mi‘mâr ağa ma‘rifetiyle tevzî‘ ve taksîm eylediklerine râzı olduk ba‘de’l-yevm husûs-ı mezkûra müte‘allik kat‘a nizâ‘ımız yokdur dedikleri ba‘de’t-tescîl nizâm-ı kadîm-i mezkûrları fîmâ-ba‘d dahi ale’d-devam düstûrü’l-amel olmak üzere esnâf-ı mezkûre ricâlinin emr-i âlî istid‘â ve istirhâm eyledikleri ma‘lûm-ı devletleri buyruldukda emr ü fermân hazret-i veliyyü’l-emrindir. Fî 25 Şa‘bâni’l-mu‘azzam sene 1162