Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 307 Hüküm no: 356 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nişancı Paşa Hamamı tellaklarından Ali Beşe, Fazlı Beşe ve diğerlerinin kendilerine ait paralarını çaldığı iddiasıyla Veliyüddin b. Abdülfettah’a açtıkları davanın reddedildiği Ma‘rûz Mahmiye-i İstanbul’da Kumkapı kurbünde Nişancı Paşa Hamamı’nın dellâklarından Ali Beşe b. Mehmed ve Fazlı Beşe b. Hüseyin ve Halil Beşe b. Mustafa ve Yusuf Beşe b. Mehmed ve Süleyman Beşe b. Ali ve diğer Süleyman Beşe b. Halil nâm kimesneler Mumcu Hasan Beşe mübâşeretiyle Bâb Mahkemesi’nde meclis-i şer‘a ihzâr ettirdikleri Veliyüddin b. Abdülfettah muvâcehesinde târih-i i‘lâm günü sabah namazından sonra hamam-ı mezkûr ittisâlinde olan odamızdan piştahta derûnunda ale’l-iştirâk malımız olup adedi ma‘lûmumuz olmayan akçemizi mezbûr Veliyüddin bi-gayr-ı hakkın hufyeten ahz ve oda-i mezkûrdan çıkıp giderken işbu mu‘âyene olunan makrame derûnunda adedi ma‘lûmumuz olmayan akçeyi koynundan ahz eyledik taleb ederiz deyü da‘vâya tesâddî eylediklerinde ol dahi zikrolunan makrame derûnunda olan akçe kendi malımdır deyü iddi‘â ve mâ‘adâyı bi’l-külliye münkir olmağın müdde‘iyûn-ı mezbûrûnun takrîr-i meşrûhları üzere da‘vâları sahîha olmamağla bi-gayr-ı vech-i şer‘î mu‘ârazadan men‘ olundukları huzûr-ı âlîlerine i‘lâm olundu. Fî 26 Şa‘bâni’l-mu‘azzam sene 1162