Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 308 Hüküm no: 358 Orijinal metin no: [46a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Mustafa’nın boşandığı kocası Ayşe bt. Abdullah ile kızı Rukiye’nin biriken nafakaları ile hanımın mehrini ödemesi Ma‘rûz Zâtı ta‘rîf-i şer‘î ile mu‘arrefe olan bâ‘isetü i‘lâm Âişe bt. Abdullah nâm hatun meclis-i şer‘-i hatîrde zevc-i sâbıkı Hüseyin Ağa b. Mustafa muvâcehesinde mezbûr Hüseyin Ağa zevcim olup beni bâinen tatlîk etmekle zimmetinde mütekarrer ve ma‘kūdün-aleyh olan on guruş mehr-i müeccelim ile nafaka-i iddet-i ma‘lûmem ve meûnet-i süknâm için dahi bi’t-terâzî ta‘yîn olunan beş guruş ile bundan akdem zevcim mezbûr Hüseyin Ağa beni ve sulbiye kızı Rukiye nâm sagīreyi bilâ-nafaka bırakıp diyâr-ı âhara gitmekle benim ve sagīre kızım Rukiye’nin nafakalarımız için ber-mûceb-i hüccet kıbel-i şer‘den farz ve takdîr olunan beher yevm onar para nafaka-i mefrûza-i müstedânemizden üç ayda müctemi‘ yirmi iki buçuk guruş ki min-haysü’l-mecmû‘ otuz yedi buçuk guruş hakkımı mezbûr Hüseyin Ağa’dan taleb ederim deyü da‘vâ eyledikde ol dahi kazıyye minvâl-i muharrer üzere olduğunu ikrâr ve i‘tirâf etmeğin mûcebince meblağ-ı mezkûr otuz yedi buçuk guruşu müdde‘iye-i mezbûre Âişe Hatun’a edâ ve teslîme mezbûr Hüseyin Ağa’ya tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 25 min-Şa‘bân sene 1162