Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 309 Hüküm no: 359 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Mansur ile hanımı Zeyneb bt. Abdullah’ın, Osman b. Abdullah’ın tasarrufunda bulunan vakıf eve yaptıkları masrafın kendilerine iadesi Bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyâna savb-ı şer‘den bi’l-iltimâs ta‘yîn olunan keşif nâibimiz Ruhi Mustafa Efendi dâ‘îleri mi‘mârân-ı hâssadan el-Hâc Süleyman ve es-Seyyid Mehmed halîfeler ile mahmiye-i İstanbul’da Yenibahçe kurbünde Mi‘mâr Sinan mahallesinde vâki‘ bir tarafdan Bayrakdâr el-Hâc Ali menzili ve bir tarafdan Berber Mustafa menzili ve bir tarafdan ba‘zen Şerife Hatun ve ba‘zen Hâcce Hatun menzilleri ve bir tarafdan tarîk-ı âm ile mahdûd mahâll-i nizâ‘ olan menzile varıp cerîdede mastûrü’l-esâmî Müslimîn huzûrunda akd eylediği meclis-i şer‘-i şerîf-i nebevîde sahib-i arzuhâl Mustafa Beşe b. Mansur ve zevcesi Zeyneb bt. Abdullah nâm hatun zâtı ba‘de’t-ta‘rîfi’ş-şer‘î hasımları derûnda mezkûrü’l-ism Osman Çelebi b. Abdullah mahzarında her biri bundan akdem mezbûr Osman Çelebi menzil-i mahdûd-ı mezkûru harâb iken mülkü olmak üzere iştirâken bize yüz on guruşa bey‘ etmekle yıkıp işbu mu‘âyene olunan bir bâb fevkānî oda ma‘a dehliz ve ocak ve tahtânî kenîfi müştemil menzili mahdûden binâ eylediğimizden sonra menzil-i mezbûr süknâsı evlâda meşrûta yine mezbûr Osman Çelebi’nin ceddi Hacı Kurd’un vakfı idiği sâbit olmağla yedimizden nez‘ ve semeni bize reddolunmuşidi el-hâletü hâzihî binâ masrûfumuz bâkī kalmağın keşif ve hesâb ve kıymeti tazmîn olunsun deyü ba‘de’d-da‘vâ ve’s-suâl mezbûr Osman Çelebi cevâbında <> fi’l-hakīka menzil-i mezkûru harâb iken mülkü olmak üzere müdde‘iyân-ı mezbûrâna semen-i merkūma bey‘ ba‘dehû ber-minvâl-i muharrer vakfiyeti sâbite olmağla yedlerinden nez‘ ve şer‘le kendilere semeni reddolunduğunu ikrâr ve lâkin ihdâs eyledikleri ebniye-i merkūme enkāz-ı kadîme ile mahlût olmağın cedîdin kıymetinde nizâ‘ edicek mi‘mârân-ı mezbûrân ihbâr ve ittifâkları ile enkāz-ı mevcûde ba‘de’l-ihrâc ebniye-i cedîdenin mesârif-i lâzımesiyle mebniyeten kıymeti yüz seksen üç guruşa bâliğ olmağın mûcebiyle ba‘de’l-hükm meblağ-ı mezbûru müdde‘iyân-ı merkūmâna teslîme mezbûr Osman Çelebi’ye tenbîh olunduğu mevlânâ-yı mûmâ-ileyh mahâllinde ketb ü tahrîr ve ma‘an ba‘s olunan ümenâ-i şer‘le gelin alâ-vukū‘ihî inhâ ve takrîr eylediği huzûr-ı âlîlerine i‘lâm olundu. Fî 10 Şa‘bân sene 1162