Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 310 Hüküm no: 360 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Serkiz’in, Siroz mübayaacısı Mustafa Ağa’nın şinikcisi Vartan v. Pedros’a açtığı alacak davasında haksız bulunduğu Bâ-mühr-i hazret-i efendi Ma‘rûz İstanbul’da Küçükkaraman mütemekkinlerinden ve dülger tâifesinden Karabet v. Serkiz zimmî meclis-i şer‘-i enverde Muhzır Hacı Süleyman mübâşeretiyle ihzâr-ı şer‘ ettirdiği Vartan v. Pedros zimmî muvâcehesinde târih-i i‘lâmdan on bir ay mukaddem merkūm Vartan zimmî Siroz mübâya‘acısı Mustafa Ağa nâm kimesnenin şinikcisi olmağla şinikcilik hizmetinden her ne hâsıl olur ise nısfı kendinin ve nısf-ı âharı benim olmak üzere benimle ba‘de mukāveleti akdi’ş-şirketi ve’l-kabûl merkūm Vartan zimmî ile dokuz ay mübâya‘acılık hitâmına değin hizmet-i mezkûrede ba‘de’l-i‘mâl ve’l-itmâm merkūm Vartan zimmî mübâya‘acı-i mezkûr Mustafa Ağa’dan hizmet-i mezkûre ücretinden makbûzu olan üç yüz altmış guruşdan ber-mûceb-i şirket-i mezkûre bana isâbet eden yüz seksen guruşdan otuz guruşunu ahz ve istifâ edip ve yüz elli guruşu zimmetinde bâkī kalmağla taleb ederim deyü olan da‘vâsında şirket-i mezkûre sahîha olmayıp ancak i‘ânetiyle amel-i mezkûrunun ecr-i misli iktizâ edip ve müdde‘â-aleyh merkūm Vartan zimmî dahi cevâbında fi’l-vâki‘ müdde‘î-i mesfûr Karabet zimmînin hizmet-i mezkûrede talebiyle i‘ânetini ikrâr lâkin müdde‘î-i mesfûr Karabet zimmî târih-i i‘lâm senesi Recebi’l-ferd’inin yirmi üçüncü günü mahrûse-i Edirne’de mahkeme-i suğrâda zikrolunan şinikcilik hizmetinin ecr-i misli da‘vâsından benim zimmetimi ibrâ ve ıskāt etmişidi deyü olan def‘ini müdde‘î-i mesfûr Karabet zimmî ikrâr ve i‘tirâf etmeğin mûcebiyle ba‘de’l-hükm mesfûr Karabet zimmî bî-vech-i şer‘î da‘vâ-yı mezkûresiyle merkūm Vartan zimmî[ye] mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 28 Şa‘bân sene 1162