Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 77 Hüküm no: 74 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal’daki Surp Nişan Kilisesi’nin mütevellisi Kazgancıoğlu Bogos’un kilisenin vakfına ait olan bağı Avanis’e sattığı Medîne-i Üsküdar’a muzâfe Adalar nâhiyesine tâbi‘ Kartal kasabasında vâki‘ Nişan demekle ma‘rûf Ermeni Kilisesi fukarâsının nukūd-ı mevkūfesinin mütevellîsi olan Kazgancıoğlu Bogos v. Bedros zimmî meclis-i şer‘de işbu râfi‘ü’r-rakīm Avanis v. Haçador muvâcehe[sinde] bi’t-tevliye ikrâr ve takrîr-i kelâm edüp akd-i âti’z-zikrin sudûruna değin vakf-ı mezkûrun mülkü olup Abdurrahman Ağa toprağında Acıhamam nâm mevzi‘de kâin bir tarafı Karakulak Mehmed Beşe bağı ve bir tarafı Sülükoğlu bostanı ve bir tarafı Aci Yanaki bağı ve bir tarafı tarîk-i âm ile mahdûd tahmînen yedi dönüm kürûmî mülk vişne eşcârlı ve bir vakıf bi’r-i mâyı müştemil kış ve çavuş bağı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūma yüz elli beş guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezbûr yüz elli beş guruşu müşterî-i merkūm yedinden bi’t-tamâm ve’l-kemâl cânib-i vakıf içün ahz ü kabz eyledim fîmâ-ba‘d zikri mürûr eden bağda tevliyetim hasebiyle kat‘â ve kātıbeten alâka ve medhalim kalmayup müşterî-i merkūm Avanis zimmînin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’s-sânî ve’l-ışrîn min-şehri Muharremü’l-haram li-sene semânîn ve mi’ete ve elf. Şuhûdü’l-hâl: Serdâr Mehmed Ağa, Berber Memiş, Duhânî Mehmed Beşe, Hacı İbrahimoğlu Ahmed Efendi. Kirkor, Aci Sahak, Avak, İnegöllü Aci Baron, Aci Mikail.