Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 310 Hüküm no: 361 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Yorgi v. Kiga’nın, kereste bedelinden Karaman v. Yasef’e olan borcunu ödemesi Ma‘rûz Mahmiye-i İstanbul’da Odunkapısı hârici kerestecilerinden Karaman v. Yasef nâm zimmî meclis-i şer‘-i enverde mahmiye-i mezbûrede Mirâhur mahallesi fırını ustası olup Muhzır es-Seyyid Osman mübâşeretiyle ihzâr olunan Yorgi v. Kiga zimmî muvâcehesinde mukaddemâ merkūm Ekmekçi Yorgi zimmî fırın-ı mezkûrun ta‘mîr ve binâsi’çün malımdan ve yedimden ma‘lûmü’l-envâ‘ ve’l-ecnâs ve’l-mikdâr müfredât defteri mantûkunca üç yüz kırk iki guruşluk kereste iştirâ ve kabz etmişidi hâlâ semen-i mezkûru taleb ederim deyü ba‘de’d-da‘vâ ve’s-suâl ve’l-inkâr müdde‘î-i mesfûr Karaman zimmî müdde‘âsını beyândan ızhâr-ı acz birle lede’l-istihlâf merkūm Yorgi’nin yemîn etmem lafzını tasrîh ile olan nükûlüyle isbât etmeğin mûcebiyle ba‘de’l-hükm meblağ-ı mezkûr üç yüz kırk iki guruşu müdde‘î-i mesfûr Karaman zimmîye edâ ve teslîm ile merkūm Yorgi zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu. [Fî] 18 Ş sene 1162