Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 312 Hüküm no: 364 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Yako v. İstemori’nin, alacak iddiasıyla Pavlo Kalfa v. Sefer ile ortaklarına açtığı davada Pavlo’nun miktarını kabul ettiği borcunu ödemesi, reddettiği miktar için de Yako’ya ispat için süre verildiği Ma‘rûz İstanbul hısnı ebvâbından Odunkapısı hâricinde sâkin Keresteci Yako v. İstemori nâm zimmî Bâb Mahkemesi’nde meclis-i şer‘de Dîvân-ı âlî çavuşlarından Halil Çavuş mübâşeretiyle ihzâr ettirdiği keresteci tâifesinden Pavlo Kalfa v. Sefer v. Leket nâm zimmî tarafından zikri âtî husûsa vekîl olduğu Simyon v. Uğurlu ve Mihail v. Bağvan nâm zimmîler şehâdetleriyle sâbit olan Yoseb v. Vasil nâm zimmî muvâcehesinde bin yüz kırk dokuz senesi ibtidâsından elli beş senesi gāyetine gelince müvekkil-i mesfûr Pavlo Kalfa ile şerîkleri Sava ve Bali nâm zimmîlere talebleriyle yazıcılık hizmeti ile altı sene hizmet eylediğimden sonra zikrolunan elli beş senesinde mesfûrûn fesh-i şirket edip hesâblarını gördüklerinde sinîn-i mezkûrede müctemi‘ olan elli beş bin akçe ücretimden müvekkil-i mesfûr Pavlo Kalfa zimmetine isâbet eden on sekiz bin üç yüz otuz akçe hakkım ile yine mesfûr Pavlo Kalfa bin yüz elli dört senesinde Anadolu’da Sakarya nâm mahâlden altı aded kebîr karaağaç kerestesi kat‘ edip her ne mikdârı meblağ sarf edersen eyle deyü bi-şarti’r-rücû‘ emretmekle emr-i mezkûruna binâen kereste-i mezkûru mahâll-i mezkûrdan kat‘ ettirmeğe on sekiz bin akçe ve mahâll-i mezkûrun sipâhisine izin akçesi bin sekiz yüz akçe ve yine kereste-i mezkûru Âsitâne’ye nakl için navl-ı sefîneye üç bin altı yüz akçe ve yine târih-i mezkûrda müvekkil-i mesfûrun emriyle kendi malı olan kereste-i ma‘lûmesini Âsitâne’den Kuzguncuk’a nakl için mavna navlu ve hammâliyesine dört bin altı yüz yirmi beş akçe ki min-haysü’l-mecmû‘ altmış yedi bin dokuz yüz elli beş akçe hakkım olmağla müvekkil-i mezbûrdan taleb ederim deyü ba‘de’d-da‘vâ ve’s-suâl vekîl-i mesfûr Yoseb zimmî ancak ücret-i mezkûrdan on sekiz bin üç yüz otuz akçeyi bi’l-vekâle ikrâr mâ‘adâyı inkâr edicek müdde‘î-i mezbûr mâ‘adâ müdde‘âları’çün beyâna ba‘de’l-havâle ikrârı olan meblağ-ı mezkûr on sekiz bin üç yüz otuz akçeyi müvekkil-i mesfûr Pavlo Kalfa müdde‘î-i mezbûr Yako zimmîye edâ ve teslîm etmek üzere vekîl-i mezbûr Yoseb zimmîye tenbîh olunduğu huzûr-ı âlîlerine i‘lâm olundu. Fî-selhi Şa‘bân sene 1162