Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 313 Hüküm no: 365 Orijinal metin no: [47a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi b. Mehmed ile komşusu Afife bt. Hacı Mehmed’in arasındaki duvar ve kapı anlaşmazlığında sulh oldukları Bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyâna savb-ı şer‘den bi’l-iltimâs ta‘yîn olunan keşif nâibimiz Ruhi Mustafa Efendi dâ‘îleri mi‘mârân-ı hâssadan Halil halîfeler ile mahâll-i nizâ‘a varıp cerîdede mastûrü’l-esâmî Müslimîn huzûrunda akd eylediği meclis-i şer‘de sahib-i arzuhâl İbrahim Efendi b. Mehmed hasmı Afife bt. el-Hâc Mehmed’in vekîl-i sâbitü’l-vekâlesi zevci el-Hâc Ahmed Efendi b. Süleyman muvâcehesinde mutasarrıf olduğu merhûm İskender Ağa Vakfı’ndan mahalle-i mezbûre imâmına meşrûta menzili duvarına müte‘allik nizâ‘ından tavassut-ı muslihîn ile zikrolunan duvar vakıf olduğu hâlde beynlerinde müşterek ve mukaddemâ vekîl-i mezbûrun hedm eylediği mahâllini kemâ-fi’l-evvel kendi malıyla binâ ve damlalık ve havâsını binâdan hâlî terk ve îkād ve ittisâlinde vâki‘ mezbûre Afife’nin saçağı damlası mezbûr İbrahim’in duvarına muttasıl olmağla başka zararına binâen bundan akdem vaz‘ olunan oluk kifâyet etmemekle mi‘mârân-ı mezbûrân ihbârı ile bir zirâ‘ mikdârı oluk zam ve izâfe ve zikrolunan damlalıkda mezbûre Afife tarafından çirkâb kapısı misilli mevcûd bulunan muhaddesât bi’l-külliye kal‘ ve ref‘ [47b] olunmak üzere beynleri ıslâh olundukdan sonra derûnları mezkûr münâza‘un-fîh olan yüz on zirâ‘ arsa ma‘a’l-binâ mezbûre Afife’nin mülkü olduğunu mezbûr İbrahim Efendi ikrâr ve sahib-i meşrûta mahalle-i mezbûre imâmı Salih Efendi hazır bi’l-meclis olduğu hâlde tasdîk etmeğin ol vechile herbiri âharın zimmetlerini ibrâ ve kat‘-ı nizâ‘ eylediklerini mevlânâ-yı mûmâ-ileyh inhâsıyla huzûr-ı âlîlerine i‘lâm olundu. Fî-selhi Şa‘bân sene 1162