Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 313 Hüküm no: 366 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Ali’nin Yorgancı İbrahim Çelebi b. Mehmed’e olan borcunu ödemesi Ma‘rûz Mahmiye-i İstanbul’da Altıpoğaça mahallesi sâkinlerinden Yorganî İbrahim Çelebi b. Mehmed meclis-i şer‘-i enverde mahmiye-i mezbûrede Tarsusî mahallesi sâkinlerinden diğer İbrahim Çelebi b. Ali muvâcehesinde işbu mezbûr diğer İbrahim Çelebi zimmetinde işbu yedime verdiği memhûr temessüğü mantûkunca cihet-i karzdan zimmetinde yüz seksen guruş hakkım olmağla taleb ederim deyü ba‘de’d-da‘vâ ve’s-suâl mezbûr diğer İbrahim Çelebi cevâbında fi’l-vâki‘ müdde‘î-i mezbûra ber-vech-i muharrer yüz seksen guruş deyni olmak üzere temessük verdiğini ikrâr lâkin meblağ-ı mezkûrun ancak yüz yirmi guruşu deynim olup ziyâde altmış guruşu ribâdır deyü olan def‘ini ba‘de’l-inkâr mezbûr diğer İbrahim beyâna kādir olamayıp istihlâf dahi etmemeğin alâ-mûceb-i ikrârihî meblağ-ı mezkûr yüz seksen guruşu müdde‘î-i mezbûr Yorganî İbrahim Çelebi’ye edâ ve teslîm ile mezbûr diğer İbrahim Çelebi’ye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 28 min-Şa‘bân sene 1162