Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 314 Hüküm no: 367 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacı esnafının nizamlarına aykırı hal ve hareketleri olan kethudaları Süleyman b. Ali’nin görevden alınıp yerine Ahmed Odabaşı b. Mehmed’in tayin edilmesi talepleri Bâ-mühr-i hazret-i efendi Ma‘rûz Ashâb-ı arzuhâl helvâcı esnâfının yiğitbaşıları el-Hâc Mehmed ve ustalarından es-Seyyid Mehmed Çelebi ve Mustafa Çelebi ve Mehmed Çelebi ve Hüseyin Beşe ve Mustafa Beşe ve Mehmed Çelebi ve İsmail Çelebi ve diğer Mehmed Çelebi ve Ahmed Beşe ve es-Seyyid el-Hâc Hüseyin ve âhar Mehmed Çelebi ve diğer Ahmed Çelebi ve Mehmed Çelebi ve Hüseyin Çelebi ve Mehmed Çelebi ve Molla Mustafa ve es-Seyyid Mehmed ve Hüseyin Beşe ve Ahmed Beşe ve Hasan Çelebi ve Ali Çelebi ve Hüseyin ve Hâfız İsmail ve Süleyman Usta ve Yusuf ve sâir cerîdede mazbûtü’l-esâmî yirmi neferden mütecâviz ustalar meclis-i şer‘de derkenârda mezkûrü’l-ism berat-ı âlîşân ile kethudâları olan Süleyman b. Ali nâm kimesne muvâcehesinde işbu mezbûr kethudâmız olup lâkin kendi hâlinde olmayıp herbirimizi hilâf-ı şer‘ tecrîm ve tagrîm ve nizâm-ı kadîmimizin hilâfı hareket ile külliyyen ihtilâlimize bâdî olmuşdur el-hâsıl mezbûrun evzâ‘ ve etvârından bir vechile hoşnûd ve râzı değiliz deyü herbiri teşekkî ve mezbûr kethudâlığımızdan ref‘ ve yerine işbu hazır bi’l-meclis ihtiyâr ustalarımızdan cümlemizin muhtârı olan Ahmed Odabaşı b. Mehmed esnâfımıza kethudâ nasb ve ta‘yîn buyurulmak matlûbumuzdur dediklerinde merkūmûnun kethudâları mezbûr Süleyman’dan teşekkîleri ve ref‘inden ber-minvâl-i muharrer muhtârları olan merkūm Ahmed Odabaşı esnâflarına rızâlarıyla kethudâ nasb buyurulmak bâbında istid‘â ve istirhâmları ma‘lûm-ı devletleri buyruldukda emr ü fermân men-lehu’l-emrindir. Fî 4 Ramazan sene 1162