Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 314 Hüküm no: 368 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesi ahalisinin, uygunsuz hareketlerinden şikayetçi oldukları Hatice bt. Mustafa’nın on gün içinde mahalleden ayrılmaya söz verdiği Ma‘rûz İstanbul’da Avratpazarı kurbünde Canbaziye mahallesi imâmı İbrahim Efendi b. Mustafa ve müezzini Ali b. Mustafa ve Mehmed Said Efendi b. Mehmed ve Mehmed Ağa b. Hacı Hasan ve Mehmed Çelebi b. Abdullah Çelebi ve Abdullah Çelebi b. Debbağ Hacı Ramazan ve es-Seyyid İsmail b. İbrahim ve Feyzullah b. Ali ve Hasan b. Ali ve Ali b. Süleyman ve Hüseyin b. Yusuf ve Hüseyin b. Ali nâm kimesneler meclis-i şer‘-i enverde mahalle-i mezkûre sâkinelerinden Mumcu Mehmed Beşe mübâşeretiyle ihzâr-ı şer‘ olunan Sa‘lebî? Mehmed Beşe zevcesi demekle ma‘rûfe olan Hadîce bt. Mustafa muvâcehesinde Çukadâr es-Seyyid Hüseyin b. Hasan hazır olduğu hâlde işbu mezbûre Hadîce Hatun öteden beri kendi hâlinde olmayıp dil-âzâr ve herbirimize ta‘zîri mûceb elfâz ile şetm ve itâle-i lisân eder ve kendinin ecânib ve nâ-mahrem kimesnelerden kat‘a ictinâbı olmayıp ve her bâr kendiye nush ve pend ve men‘ ile olunan tenbîhi ısgā etmeyip evvelkinden ziyâde ısrar ve fısk ve fesâdını ızhâr eder hatta târih-i i‘lâm günü gecesi kendiye nâ-mahrem olan işbu hâzır-ı mezbûr es-Seyyid Hüseyin Çukadâr menzilinden ihrâc dahi olunmağla mezbûre Hadice’den bir vechile emn ü râhatımız yokdur deyü teşekkî ve mezbûrenin mahalleden ihrâc olunmasını iltimâs eylediklerinde mezbûre Hadîce dahi târih-i i‘lâmdan on güne değin mahalle-i mezbûreden hurûc etmeğe ta‘ahhüd edip ol vechile kat‘-ı nizâ‘ ettikleri Bâb’dan i‘lâm [olundu] Fî 5 Ramazan sene 1162