Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 315 Hüküm no: 369 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Din ve imana küfrettiğinden nikahı bozulan Hamza b. Ahmed’in, nikah tazelemeyi kabul etmeyen karısı Ümmügülsüm bt. Abdullah’a mehir ve nafaka bedelini ödemesi Ma‘rûz İstanbul’da Yenibahçe kurbünde Keçeciler mahallesi sâkinelerinden Ümmügülsüm bt. Abdullah Bâb Mahkemesi’nde meclis-i şer‘de zevc-i dâhili Hamza b. Ahmed muvâcehesinde târih-i i‘lâmdan üç gün mukaddem zevcim mezbûr Hamza beni bi-gayr-ı hakkın darb ve ağzıma ve dîn ve îmânıma cimâ‘ lafzıyla şetm etmekle ben mezbûr Hamza’dan mübâne olmağla mezbûr Hamza zimmetinde mütekarrer ve ma‘kūdün-aleyh olan bin beş yüz altmış akçe mehr-i müeccelim ile nafaka-i iddet ve meûnet-i süknâmı mezbûr Hamza’dan taleb ederim deyü ba‘de’d-da‘vâ ve’s-suâl mezbûr Hamza cevâbında fi’l-vâki‘ müdde‘iye-i mezbûre mehr-i mezkûr ile zevce-i menkûhası olduğunu ikrâr lâkin ber-vech-i muharrer şetmini inkâr etmeğin müdde‘iye-i mezbûre Ümmügülsüm ber-vech-i muharrer müdde‘âsını ahrâr-ı Müslimînden lede’t-tezkiye makbûle olan İbrahim Çavuş b. Ömer nâm kimesne ile Asiye bt. Ömer ve Zeyneb bt. Mehmed ve Âişe bt. Mehmed nâm hatunlar şehâdetleriyle mezbûr Hamza muvâcehesinde vech-i şer‘î üzere ba‘de’l-isbât ve’l-kabûl mûcebiyle mezbûr Hamza ba‘de tecdîdi’l-îmân zevce-i mezbûre tecdîd-i nikâhdan imtinâ‘ edip mehr-i mezkûrunu ve nafaka-i iddetini taleb etmekle mehr-i müeccel-i mezkûr bin beş yüz altmış akçe ile nafaka-i iddet ve meûnet-i süknâsi’çün bi’t-terâzî ta‘yîn olunan altı yüz akçe ki min-haysü’l-mecmû‘ iki bin yüz altmış akçeyi müdde‘iye-i mezbûre Ümmügülsüm Hatun’a edâ ve teslîmle mezbûr Hamza tenbîh olunduğu Bâb’dan huzûr-ı âlîlerine i‘lâm olundu. Fî 6 Ramazan sene 1162