Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 316 Hüküm no: 370 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da sığır kasapları esnafının, Edirne ve civarında belirlenen işletmelerin dışında büyükbaş hayvan kestirilmemesi ve celeplerin topladıkları hayvanları doğruca İstanbul’a sevk etmeleri için Edirne kadısı ve bostancıbaşıya emir verilmesi talepleri Ma‘rûz Ashâb-ı arzuhâl İstanbul’da vâki‘ sığır kasabı esnâfının kethudâları Mustafa ve yiğitbaşıları Mustafa ve sâir ustalarından mazbûtü’l-esâmî on neferden mütecâviz ustalar meclis-i şer‘de ez-kadîm Rumeli cânibinden Âsitâne-i sa‘âdet’e gelen öküz ve inek ve tosunu Edirne kazâsında ve civârında olan mer‘âlarda cellâb tâifesi cem‘ ve Âsitâne-i sa‘âdet’e naklolunup ve mahmiye-i Edirne’de pasdırma için sığır zebhi ez-kadîm birkaç mahâlde müte‘ayyin kimesneler yediyle olup onlar dahi kadr-ı kifâye zebh edip nizâm-ı kadîmimiz bu vech üzere iken bu esnâlarda bakkāl ve rençber ve sâir envâ‘-ı muhtelifeden kimesneler peydâ ve kârhâneler ihdâs ve cellâb yedlerinde bulunup Âsitâne-i sa‘âdet’e gelecek öküz ve inek ve tosunu itmâ‘ ile yedlerinden alıp itlâf ve izâ‘at eyledikleri Âsitâne-i sa‘âdet’de ibâdullâhın müzâyakalarına bâdî bir hâlet olmağla fîmâ-ba‘d kadîmden olan nizâm üzere cellâb tâifesi Edirne ve civârında olan mer‘âlardan getirip cem‘ eyledikleri öküz ve inek ve tosunları Âsitâne-i sa‘âdet’e getirip Edirne’de kadîmden olduğu üzere birkaç mahâlden mâ‘adâ muhdes kârhâne peydâ eden mechûl kimesnelere sığır zebh ettirilmeyip men‘ olunmak bâbında mahrûse-i Edirne kādısına ve bostancıbaşı kullarına hitâben müekked emr-i âlî sudûrunu istid‘â ederiz dediklerinde fi’l-hakīka ez-kadîm Edirne’de ancak birkaç mahâlde pasdırma için öküz [ve] inek zebh olunup ve bir mikdâr kâfî olmağla muhdes kârhâne peydâsının dahi lüzûm olmadığı ve cellâb tâifesi yedlerinde olan öküz ve sığır ve tosunu doğru Âsitâne-i sa‘âdet’e getirip Edirne’de ve etrâfında itlâf ve izâ‘at etmemek üzere mukaddemâ evâmir-i aliyye ile bi’d-defa‘ât tenbîh olunduğu ve nizâm-ı kadîm ber-minvâl-i muharrer [üzere] olup ve bu nizâm üzere hareket ibâdullâha menâfi‘ husûlünü müstelzim olduğunu sikāt-ı sahîhatü’l-kelimât ihbâr etmeleriyle kadîm üzere Edirne’de ancak birçok [birkaç] mahâlde pasdırma için sığır zebh olunup ve cellâb tâifesine yedlerinde cem‘ eyledikleri öküz ve tosun Âsitâne-i sa‘âdet’e getirip mugāyir-i kadîm itlâf ve izâ‘at ettirmemek bâbında Edirne kādısına ve bostancıbaşı kullarına hitâben emr-i âlîşân sudûrunu ve ber-minvâl-i muharrer istid‘â ve istirhâmları ma‘lûm-ı devletleri buyruldukda emr ü fermân hazret-i men-lehu’l-emrindir. Fî 7 Ramazan sene 1162