Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 317 Hüküm no: 371 Orijinal metin no: [48a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşnak Haseki Ahmed Ağa b. Abdullah’ın varislerinden kızı Nimetullah’ın, babasının alacağı olduğu iddiasıyla İbrahim b. Mustafa ile İsmail Reis’e açtığı davayı ispat edemediği Ma‘rûz Mahmiye-i İstanbul’da Mollagürânî Câmi‘i kurbünde sâkin iken bundan akdem vefât eden Boşnak Haseki Ahmed Ağa b. Abdullah’ın verâseti zevce-i menkûhası Ümmühani Hatun ile sulbiye kızları Nimetullah ve Zahide hatunlara ba‘de’l-inhisâr zâtı ta‘rîf-i şer‘î ile mu‘arrefe olan mezbûre Nimetullah meclis-i şer‘de İbrahim b. Mustafa muvâcehesinde babam müteveffâ-yı mezbûr hâl-i sıhhatinde fevtinden bir sene mukaddem malından mezbûr İbrahim ile gāib ani’l-meclis İsmail Reis nâm kimesneye herbiri âharın zimmetine lâzım gelen meblağa kefîl olmak üzere beş yüz altmış guruş ikrâz onlar dahi ber-vech-i muharrer iktirâz ve kabz eylediklerinden sonra meblağ-ı mezbûrun bi’d-defa‘ât üç yüz elli guruşunu edâ etmeleriyle zimmetlerinde bâkī kalan iki yüz on guruşdan hisse-i irsiyemi taleb ederim deyü ba‘de’d-da‘vâ ve’l-inkâr mezbûre Nimetullah müdde‘âsını beyâna kādire olmayıp tahlîfe dahi tâlibe olmamağın bilâ-beyyine bî-vech mu‘ârazadan men‘ olunduğu Bâb’dan huzûr-ı âlîlerine i‘lâm olundu. [Fî] 11 Ramazan sene 1162