Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 318 Hüküm no: 373 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahbaz v. Bogos’un, boşandığı kocası Maryem bt. Abraham’da olan alacağını sulh yoluyla tahsil edim Maryem’in ve kocası Kuyumcu Kigork’un zimmetlerini ibra ettiği Ma‘rûz İstanbul’da Odunkapısı sûkunda sebzevât yazıcısı sahib-i arzuhâl Şahbaz v. Bogos zimmî meclis-i şer‘-i enverde derûn-ı arzuhâlde mezkûre Maryem bt. Abraham zimmiye muvâcehesinde merkūme Maryem’in hâlâ zevci Kuyumcu Kigork v. Serkiz zimmî hazır olduğu hâlde işbu merkūme Maryem zimmiye benim zevce-i menkûham olup mukaddemâ ben bir husûsum için diyâr-ı âhara gider iken malımdan sekiz yüz kırk guruşumu menzilimde zevcem merkūme Maryem’e îdâ‘ ve teslîm ol dahi yedimden ahz u kabz etmişidi hâlâ geldiğimde zevcem merkūme Maryem bi-gayr-ı hakkın nefsini işbu hâzır-ı mesfûra tezvîc ve benden hâsıl olan yedi aylık hamlini dahi zevc-i sânî-i merkūm ıskāt etmeğin zevcem merkūme Maryem zevc-i sânîden tefrîk ve bana inkıyâdına ve yedinde vedî‘am olan sekiz yüz kırk guruşu bana red ve teslîmine tenbîh ve sıkt-ı mezkûrun mûceb-i şer‘îsini taleb eylediğimde merkūme Maryem dahi cevâbında fi’l-vâki‘ mukaddemâ benim zevce-i menkûham olduğunu ikrâr ancak benden iki sene mukaddem beni bâinen tatlîk ve yedime ber-vech-i muharrer tatlîkımı işbu bir kıt‘a temessüğü dahi vermişidin deyü takrîr-i meşrûhuna mutâbık ve mazmûnu şühûd-ı kesîre ile sâbit ibrâz eylediği bir kıt‘a temessük olan def‘ini ben dahi zarûreten ikrâr edip lâkin zevce-i mutallakam merkūmeden müdde‘âm olan sekiz yüz kırk guruşdan bâ-vesâtet-i muslihîn mutallakam merkūme Maryem zimmiye ile yirmi aded Mısrî zencirli altın bedel-i makbûza sulh olup mâ‘adâsına ve zikrolunan da‘vâsına müte‘allika âmme-i da‘vâdan mutallakam merkūme Maryem ve zevci merkūm Kuyumcu Kigork zimmîlerin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde mesfûrân dahi ibrâ-i mezkûru ba‘de’l-kabûl bedel-i medfû‘alarına müte‘allika âmme-i da‘vâdan benim zimmetimi ibrâ ve ıskāt eylediler deyü olan ikrârını merkūmân Maryem ve zevci Kuyumcu Kigork zimmîlerin dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 15 Ramazan sene 1162