Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 319 Hüküm no: 374 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici Yorgi v. Yanaki’nin, Sahtiyancılar Yusuf Çelebi ve Süleyman Çelebi ile Kutnîci Nikola ve Çizmeci Panayot’a olan borçlarını taksitler halinde ödemek üzere anlaştığı Ma‘rûz İstanbul’da Balıkpazarı sûku ahâlîsinden Dikici Yorgi v. Yanaki nâm zimmîden muvâcehesinde dâyinlerinden Sahtiyâncı Yusuf Çelebi b. Halil nâm kimesne yedinden müşterâ ve makbûz ma‘lûmü’l-mikdâr sahtiyân semeninden yüz guruş ve Sahtiyâncı Süleyman Çelebi b. Hamza’ya cihet-i deyn-i şer‘îden seksen guruş ve Kutnîci Nikola v. Kostantin yedinden müşterâ ve makbûz ma‘lûmü’l-mikdâr kutnî semeninden yüz yirmi guruş ve Çizmeci Panayot v. Dimitri zimmî dahi yedinden müşterâ ve makbûz ma‘lûmü’l-mikdâr çizme gönü semeninden yüz guruş haklarımız vardır taleb ederiz deyü da‘vâ ve merkūm Yorgi zimmî dahi müdde‘ûn-ı mezkûrûndan herbirine müdde‘âları mikdârı düyûnu olduğunu ikrâr ancak fakīr ve mu‘sir ve mu‘dim olup düyûn-ı mezkûresini def‘aten edâya iktidârı olmadığını iddi‘â ve beher şehr guruş başına birer akçe verip müddet-i ma‘lûme tamamına değin düyûn-ı mezkûresini edâ etmek üzere taksîte tâlib olmağla müdde‘ûn-ı mezkûrûn dahi zimmî-i medyûn-ı mesfûrun fakīr ve mu‘sir olduğunu i‘tirâf edip düyûn-ı mezkûrelerinden kendilerine beher şehr guruş başına birer akçe verip târih-i i‘lâmdan yüz yirmi ay tamamına değin mukāssaten edâ etmek üzere tecîl eylediklerinde zimmî-i medyûn-ı mesfûr Yorgi dahi ba‘de’l-kabûl düyûn-ı mezkûresini ber-taksît-i mezkûremden müdde‘ûn-ı mezkûrûna edâya ta‘ahhüd ve iltizâm eylediği Bâb’dan huzûr-ı âlîlerine i‘lâm olundu. Fî 15 Ramazan sene 1162