Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 319 Hüküm no: 375 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraçhane esnafının şikayetleri üzerine Bitpazarı koltukçularının saraç esnafına ait eşyaları satmaktan menedildikleri Ma‘rûz Saraçhâne ahâlîsinden kethudâları Mehmed Çelebi ve yiğitbaşıları Halil Çelebi ve mütevellîleri el-Hâc Halil ve sâir ustalardan cerîdede mazbûtü’l-esâmî kimesneler Yeniçeri ocağı yazıcılarından el-Hâc Mehmed Emin Yazıcı mübâşeretiyle meclis-i şer‘a ihzâr ettirdikleri Bitpazarı oturakçılarından Haza[r] v. Agop ve Avak v. Meyasir ve Karabet v. Tatuk nâm zimmîler muvâcehelerinde Bitpazarı kethudâsı Ebûbekir ve yiğitbaşısı el-Hâc Eyüb ve sâir ustaları hazır oldukları hâlde işbu yedimizde olan hutût-ı hümâyûn-ı şevket-makrûn ile mu‘anven evâmir-i aliyye mûceblerince merhûm ve mağfûrun-leh Ebulfeth Sultan Mehmed Han tâbe serâhu zamanında Saraçhâne binâ ve sarrâc esnâfı iskân olundukda Saraçhâne’den gayri mahâlde sarrâc metâ‘ı işlenmeyip ve cedîd [ve] köhne sarrâc metâ‘ı ancak Saraçhâne’de bey‘ ve şirâ olunmak üzere hatt-ı hümâyûnla mu‘anven emr-i âlîşân sâdır ve bu vechile nizâm verilip ba‘dehû zîb-efzâ-yı taht-ı Osmânî olan selâtîn-i izâm dahi nizâm-ı mezkûru takrîr ve fermân-ı âlîşânlarıyla te’kîd edip hatta hâlâ pâdişâh-ı İslâm ve şehin-şâh-ı enâm ebbedallâhu ilâ-âhiri’l-eyyâm hazretleri dahi nizâm-ı mezkûru te’yîden yedimize hatt-ı hümâyûn-ı şevket-makrûnuyla mu‘anven emr-i âlîşân ihsân etmeğin işbu mesfûrûn zimmîler ve gāib ani’l-meclis Panos zimmî Bitpazarı’nda olan oturakçı dükkânında hilâf-ı nizâm-ı kadîm ve mugāyir-i hatt-ı hümâyûn-ı şevket-makrûn sarrâc emti‘asını bey‘ ve şirâ edip bir vechile mütenebbih olmamalarıyla gereği gibi tenbîh-i şer‘î ve men‘-i küllî olunması matlûbumuzdur deyü min-külli’l-vücûh mezâmîni takrîr-i meşrûhlarına mutâbık [e]vâmir-i aliyye ibrâz etmeleriyle gıbbe’s-suâl mesfûr zimmîler dahi dükkânlarında sarrâc emti‘asını mugāyir-i emr-i âlî bey‘ ve şirâ eylediklerini mu‘terif olmalarıyla ber-mûceb-i hatt-ı hümâyûn-ı şevket-makrûn ba‘de’l-yevm cedîd ve köhne sarrâc metâ‘ını dükkânlarında kat‘a bey‘ ve şirâ etmemek üzere mesfûrûn zimmîlere ve sâirleri’çün dahi kethudâlarına tenbîh-i ekîd olunduğu ve ba‘de’l-yevm her kangısından hilâf-ı hatt-ı hümâyûn ve mugāyir-i nizâm-ı mezkûr hareket zuhûr eder ise gereği gibi ta‘zîr ve tedîb olunacağı herbirine tefhîm olunduğu huzûr-ı âlîlerine i‘lâm olundu. Fî 17 min-Ramazan sene 1162