Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 321 Hüküm no: 377 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agori bt. Yani’nin, babasında intikal eden bağın değerinden düşük fiyatla satıldığından satışın iptal edilmesi talebiyle Bakkal Tanaş v. Dimo’ya açtığı davanın zaman aşımı dolayısıyla reddedildiği [Ma‘rûz] Vilâyet-i Rumeli’de Çatalca kazâsına tâbi‘ Nehori nâm karye mütemekkinlerinden iken mukaddemâ hâlik olan Yani v. Panayot zimmînin verâseti sulbî oğulları Kostantin ve Yorgi ve kızları Agori ve Hırsafi zimmîlere ba‘dehû mesfûrân Kostantin ve Yorgi müte‘âkiben hâlikân olup verâsetleri li-ebeveyn kız karındaşları mesfûretân Agori ve Hırsafi’ye münhasıra olduğu lede’ş-şer‘i’l-enver zâhir ve mütehakkık oldukdan sonra mesfûre Agori zimmiyenin zevci ve tarafından husûs-ı âti’z-zikre vekîl olduğu zât-ı mesfûreyi ârifân Anaştaş v. Kostantin ve Nikola v. Yorgo zimmîler şehâdetleriyle nehc-i şer‘î üzere sâbit ve sübût-ı vekâleti mahkûmun-bih olan Tanaş v. Risto zimmî meclis-i şer‘-i enverde mârrü’z-zikr Hori karyesi ahâlîsinden derûn-ı arzuhâlde mezkûr bakkāl diğer Tanaş v. Dimo zimmî muvâcehesinde târih-i i‘lâmdan yirmi dört sene mukaddem işbu merkūm bakkāl diğer Tanaş zimmî zevcem ve müvekkilem mesfûre Agori ile kız karındaşı merkūme Hırsafi zimmiyelerden babalarından mevrûs karye-i mezbûrede vâki‘ bir tarafdan Yanikol bağı ve bir tarafdan Anaştaş ve bir tarafdan Aleksi bağı ve bir tarafdan tarîk-ı âm ile mahdûd beş yüz guruş değer iki buçuk dönüm bağlarını otuz beş guruş değer ziyâde değmez deyü merkūmetânı tagrîr ve kıymet-i mezkûresinden noksan-ı efhaş olan otuz guruş semen-i medfû‘a iştirâ ve kabz etmişidi ancak akd-i mezkûr fâsid olmağla bi-hükmi’l-fesâdi’l-mezkûr bağ-ı mahdûd-ı mezkûrda müvekkile-i merkūmenin nısf hissesinde fesh-i bey‘-ı mezkûr ile semen-i medfû‘-ı mezkûrun nısfını bi’l-vekâle yedimden geri ahz edip bağ-ı mahdûd-ı mezkûrun nısfından kasr-ı yedine tenbîh taleb ederim deyü takrîr-i meşrûhu üzere yirmi dört sene mürûr eden tagrîr da‘vâsının hasm-ı merkūm dahi tagrîr-i mezkûru münkir olmağla istimâ‘ı memnû‘âtdan olmağın merkūm diğer Tanaş zimmîye suâl teveccüh etmeyip vekîl-i müdde‘î-i mesfûr Tanaş zimmî bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 17 min-şehri Ramazan sene 1162