Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 324 Hüküm no: 383 Orijinal metin no: [50a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Osman’ın, müştereken çalıştırdıkları Kör Ali Ağa Vakfı hamamının kirasından kalan alacağını Ümmügülsüm bt. Ali’nin ödemesine yapılan tenbih Ma‘rûz <> Zâtları Mustafa b. Ahmed ve el-Hâc Mehmed b. Mustafa ta‘rîfleriyle mu‘arrefetân olan sahibe-i arzuhâl Fâtıma bt. Osman meclis-i şer‘de derûn-ı arzuhâlde mezkûre Ümmügülsüm bt. Ali muvâcehesinde İstanbul’da Lütfi Paşa sûkunda vâki‘ Kör Ali Ağa Vakfı olan hamam ber-vech-i mâlikâne iştirâk-i seviy üzere mezbûre Ümmügülsüm ile tasarrufumuzda olup ben nısf hissemi beher mâh on beş guruş ile beher mâh taraf-ı vakfa verilegelen yüz elli para icârenin nısfı olan yetmiş beş parayı dahi mezbûre Ümmügülsüm vermek üzere kendiye îcâr eylediğimde ol dahi ber-vech-i muharrer ba‘de’l-istîcâr ve’l-kabûl târih-i i‘lâma gelince mürûr eden otuz aydan bâkī dokuz aylık yüz otuz beş guruş icâremi taleb ve da‘vâya tesâddî eylediğimde ol dahi hamam-ı mezkûrun nısfını beher mâh on beşer guruşa istîcarını ikrâr ve mâ‘adâyı inkâr eylediğinden sonra hamam-ı mezkûrun bazı iktizâ eden mesârifine yirmi beş guruş sarfım vardır demekle beynimizde ba‘de’l-münâza‘a vesâtet-i muslihîn ile mezbûre Ümmügülsüm bana altmış guruş vermek üzere sulh eylediklerinde herbirimiz sulh-ı mezbûru kabûl eylediğimizden sonra bedel-i sulh olan meblağ-ı mezkûrun on guruşunu mezbûre Ümmügülsüm bana def‘ ve teslîm edip mâ‘adâ elli guruş zimmetinde kalmağla taleb ederim deyü da‘vâ eyledikde ol dahi ikrâr ve i‘tirâf etmeğin alâ-mûceb-i i‘tirâfihâ meblağ-ı mezbûr elli guruşu mezbûre Fâtıma’ya edâ ve teslîme mezbûre Ümmügülsüm’e tenbîh olundu Bâb’dan i‘lâm-şüd. Fî 23 Ramazan sene 1162