Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 329 Hüküm no: 393 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oseb v. Mikail’in, Vartan v. Haçador’daki alacağına kefil olan Ariton v. Bağdasar’la sulh yoluyla anlaşarak parasını tahsil ettiği Ma‘rûz Sahib-i arzuhâl Oseb v. Mikail zimmî meclis-i şer‘-i enverde derûn-ı arzuhâlde mastûrü’l-ism Ariton v. Bağdasar nâm zimmî muvâcehesinde gāib ani’l-beled Vartan v. Haçador v. Asvador zimmî zimmetinde cihet-i karz-ı şer‘îden seksen guruş hakkıma mesfûr Ariton zimmî bi’l-emr ve’l-kabûl kefâlet-i sahîha-i şer‘iye ile kefîl oldukdan sonra meblağ-ı mezkûrdan on guruşunu mesfûr Ariton yedinden ba‘de’l-kabz yetmiş guruş hakkım bâkī kalmışidi hâlâ meblağ-ı bâkī-i mezkûru dahi kefâlet-i mezkûresine binâen mesfûr Ariton zimmîden taleb ederim deyü tesâddî eylediğim da‘vâmdan bâ-vesâtet-i muslihîn yirmi guruş bedel-i makbûza sulh olup mâ‘adâsına müte‘allika da‘vâdan mesfûr Ariton ile gāib-i mersûm Vartan zimmînin zimmetlerini ibrâ ve ıskāt eyledim deyü olan ikrârını ba‘de’t-tasdîk Mahkeme-i Bâb’dan huzûr-ı âlîlerine i‘lâm olundu. Fî 13 Şevval sene 1162