Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 335 Hüküm no: 405 Orijinal metin no: [52b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Nefise bt. Mustafa’nın geçinemediği kocası Hasan’dan muhâlaa yoluyla boşandığı Ma‘rûz Sahibe-i arzuhâl Şerife Nefise bt. el-Hâc Mustafa nâm hatun zâtı ba‘de’t-ta‘rîfi’ş-şer‘î meclis-i şer‘-i hatîrde zevc-i dâhili olup derûn-ı arzuhâlde mezkûrü’l-ism el-Hâc Hasan mahzarında mezbûr el-Hâc Hasan zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan beş yüz guruş mehr-i müeccelim ve nafaka-i iddetim üzerlerine ve kendiye medfû‘um olan üç yüz guruş bedel-i hul‘ olup ve meûnet-i süknâm dahi kendi üzerime olmak üzere mezbûr el-Hâc Hasan ile muhâla‘a-i sahîha-i [53a] şer‘iye ile hul‘ olduğumda ol dahi ber-vech-i muharrer hul‘-ı mezkûru ba‘de’l-kabûl Yorgancı Hacı Hüseyin ve İbrahim Çelebi’ye olan yüz altmış <> guruş deyni zevcim mezbûr el-Hâc Hasan verip hukūk-ı zevciyete ve sâire müte‘allika âmme-i da‘vâdan herbirimiz âharın zimmetini ibrâ ve ıskāt eyledik deyü olan ikrârını ba‘de’t-tasdîk Mahkeme-i Bâb’dan huzûr-ı âlîlerine i‘lâm olundu. Fî 20 min-Şevval sene 1162