Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 65 Hüküm no: 29 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya kazası Argoma nâhiyesindeki Koli köyü nısf mâlikânesinin Seyyid el-Hâc Ahmed Halîfe’ye tevcihi Ma‘rûz, Amasya kazâsı nevâhîsinden Argoma nâhiyesine tâbi‘ Koli karyesinin nısf mâlikânesi Şeyh Alâaddin Vakfı olup evlâdiyet ve meşrûtiyet üzere mutasarrıf olan es-Seyyid Mehmed b. Osman bundan akdem fevt oldukda ecânibden Mehmed b. el-Hâc Mustafa’ya tevcîh ve berat olunmuş ise de hilâf-ı şurût-ı vâkıf olduğuna binâen ref‘inden müteveffâ-yı mezbûr es-Seyyid Mehmed’in li-ebeveyn kız karındaşı Hafize Hatun bt. el-mezbûr Osman’a sadr-ı Anadolu-yı esbak i‘lâmıyla bin iki yüz kırk beş senesi Cumâdelûlâsı’nda bâ-fermân-ı âlîşân tevcîh olunup el-yevm üzerinde olduğu askerî rûznâmçesinden derkenâr olunmağla istid‘â ve derkenâra nazar ve meşrûtiyeti keyfiyeti tahkīk ve iktizâsı i‘lâm olunmak bâbında sâdır olan fermân-ı âlîşâna imtisâlen bu esnâda Der-aliyye’ye gelen bî-garaz erbâb-ı vukūfdan Amasya kasabasında Mehmed Paşa ahâlîsinden İstanbul’da Bâbıâlî civârında Beşir Ağa Medresesi’nde sâkin Müftizâde es-Seyyid Mustafa b. es-Seyyid Mehmed ve yine kasaba-i mezbûrede İmâret mahallesi ahâlîsinden İstanbul’da Ebulfeth Sultan Mehmed Han medârisinden Ayak Kurşunlu medresesinde sâkin Hocazâde es-Seyyid Davud Efendi b. es-Seyyid Mustafa ve yine kasaba-i mezbûrede Şamice mahallesi ahâlîsinden ve süvâri-yi hâssa alaylarından sekizinci alayda birinci yüzbaşının birinci onbaşısında on birinci nefer Özbekoğlu Mehmed Ağa b. Mehmed ve yine kasaba-i mezbûrede Hacı İlyas mahallesi ahâlîsinden ve alay-ı mezkûrda yüzbaşı-yı merkūmun ikinci onbaşısında sekizinci nefer Şahinoğlu es-Seyyid Mehmed Emin b. es-Seyyid Mehmed nâm kimesneler meclis-i şer‘a celb ile keyfiyeti gereği gibi etrâfıyla suâl olundukda nısf mâlikâne-i mezkûre vâkıf-ı mûmâ-ileyhin mutlaka evlâd ve evlâd-ı evlâdına meşrûta olmak üzere te‘amül-i kadîm cârî olageldiğini ve inhâ olunduğu üzere mezbûre Hafize Hatun’un bilâ-veled fevti vâki‘ ve sahib-i arzuhâl merkūm es-Seyyid el-Hâc Ahmed Halîfe müteveffât-ı mezbûre Hafize’nin babası merkūm Osman’ın li-ebeveyn karındaşı Hüseyin’in sulbî sahîh oğlu ve karye-i mezbûrenin hasran meşrûtun-lehi olup müstahıkk-ı âharı olduğu ma‘lûmumuz değildir deyü herbiri alâ-tarîkı’ş-şehâde ihbâr etmeleriyle bu sûretde nısf mâlikâne-i mezkûre te‘âmül-i kadîme nazaran müteveffât-ı mezbûrenin bilâ-veled mahlûlünden meşrûtun-lehi olduğu ihbâr olunan merkūm es-Seyyid el-Hâc Ahmed Halîfe’ye tevcîh olunmak bâbında emr [ü] fermân. Fî 11 S sene [12]48