Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 339 Hüküm no: 411 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Abdurrahman’nın kendisine intikal eden menzilin daha önce Müezzin Salih b. Hasan’a satıldığı halde kendisine geri verilmesi talebiyle açtığı davanın hukuksuz bulunarak reddedildiği Ma‘rûz Sahibe-i arzuhâl Ümmügülsüm bt. Abdurrahman Efendi b. Hasan nâm hatunun zevci ve tarafından vekîl olduğu Mahmud b. Ahmed ve İbrahim b. Süleyman şehâdetleriyle sâbit olan el-Hâc Mustafa meclis-i şer‘-i enverde merhûm Başçı el-Hâc Mahmud Mescid-i şerîfi müezzini olup derûn-ı arzuhâlde mezkûrü’l-ism Molla Salih b. el-Hâc Hasan mahzarında İstanbul’da Nevbahar mahallesinde vâki‘ ma‘lûmü’l-hudûd ve’l-müştemilât bir bâb menzilin süknâsı mescid-i mezkûrede müezzin olanlara meşrûta olup zevcem mezbûrenin babası müteveffâ Abdurrahman Efendi bi’l-icâreteyn mutasarrıf iken fevt oldukda müvekkilem mezbûre ile karındaşları İbrahim ve Zeynelabidin’e intikāl-i âdî ile ba‘de’l-intikāl karındaşları mezbûrân dahi müte‘âkiben vefât eylediklerinde mezbûrânın sülüsân hisselerini mahlûllerinden meşrûtiyyet üzere müezzin-i mezbûr zabteyleyip müvekkilem mezbûre dahi menzil-i mezkûrda olan sülüs hissesini kendi hüsn-i rızâsıyla otuz guruş bedel-i makbûz mukābelesinde bâ-ma‘rifet-i mütevellî mezbûr Müezzin Molla Salih’e ba‘de’l-ferâğ ve’t-tefvîz ve’t-tefevvüz ve’l-kabûl menzil-i mezkûra müvekkile-i mezbûre ve babası müteveffâ-yı mezbûr hayatında bazı ebniye ihdâs etmişidi deyü mukaddemâ da‘vâya tesâddî eylediğinde bazı kimesnelerin sözlerine tâbi‘ olup yirmi guruş bedel-i makbûza mezbûr Molla Salih ile sulh ve husûs-ı mezkûra müte‘allika âmme-i da‘vâdan mezbûrun zimmetini ibrâ ve ıskāt edip Davud Paşa Mahkemesi’ne varıp yedine hüccet dahi vermişidi lâkin menzil-i mezkûrun ancak arsasının müezzin-i mezbûra senede yüz seksen akçe mukāta‘a-i kadîmesi olup ebniyesi babası müteveffâ-yı mezbûrun yedinde mülk ve hakkı olmağla ba‘de’l-vefât üç evlâdına mevrûs olup ba‘dehû iki evlâdı vefât eyledikde hisseleri dahi müvekkilem mezbûreye mevrûs olmağla menzil-i mezkûru bi’l-vekâle mezbûrdan taleb ederim deyü tesâddî eylediği da‘vâsı takrîr-i meşrûhu üzere sahîha ve meşrû‘â olmayıp mezbûr Müezzin Molla Salih’e suâl dahi teveccüh etmemekle vekîl-i mezbûr el-Hâc Mustafa bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 25 min-Şevval sene 1162