Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 344 Hüküm no: 419 Orijinal metin no: [54b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi b. Himmet’in, evinin pencerelerinin ve dükkânının Sadrazam Seyyid Abdullah Paşa b. Hasan Paşa’nın sarayına olan havalesini duvar inşasıyla kapatmayı taahhüt ettiği Ma‘rûz Sâdır olan fermân-ı âlîlerine imtisâlen kıbel-i şer‘-i enverden irsâl olunan Başkâtib Mevlânâ Ömer Efendi dâ‘îleri hâssa mi‘mârlardan el-Hâc Mustafa Halîfe ve Abdullah Halîfe ile derûn-ı arzuhâlde mezkûr Mollahüsrev mahallesinde vâki‘ mahâll-i nizâ‘ üzerine varıp akd-i meclis-i şer‘-i âlî eyledikde hâlâ revnak-efzâ-yı Sadâret-i uzmâ ve mesned-ârâ-yı emânet-i kübrâ mu‘în-i ahkâm-ı şerî‘at-i müşeyyid-erkân-ı sa‘âdet olan vezîr-i müşteri-i tedbîr-i âsaf-nazîr devletlü semâhatlü sa‘âdetlü es-Seyyid Abdullah Paşa b. el-vezîr el-merhûm Hasan Paşa hazretleri taraf-ı bâhirü’ş-şereflerinden husûs-ı âti’z-zikre vekîl-i sâbitü’l-vekâleleri olan Ser-mi‘mârân el-Hâc Ahmed Ağa b. Hüseyin meclis-i ma‘kūd-ı mezkûrda [mahalle-i mezbûre] sâkinlerinden eş-Şeyh Mustafa Efendi b. Himmet muvâcehesinde mûmâ-ileyh eş-Şeyh Mustafa Efendi’nin ma‘lûmü’l-hudûd işbu menzilinin tabaka-i ulyâda vâki‘ odasında ihdâs eylediği iki aded penceresinden ve tabaka-i vüstâda vâki‘ odasında olan bir penceresinden ve menzili tahtında ihdâs eylediği bir bâb dükkândan hizâsında vâki‘ müvekkilim müşârün-ileyh [55a] hazretlerinin saray-ı âlîlerinin hareminde vâki‘ bir bâb odalarının makarr-ı nisvânı olan mahalli görünür havâlesi ve zararı olmağla bi’l-vekâle zikrolunan pencereler ve dükkân sed ile havâlesinin def‘ine tenbîh taleb ederim deyü olan da‘vâsında şeyh-i mûmâ-ileyh Mustafa Efendi dahi kendi hüsn-i rızâ ve ihtiyârıyla zikrolunan pencereleri dolma duvar ile ve dükkân-ı mezkûru dahi taş duvar binâsıyla sed etmeğe ta‘ahhüd eylediğini mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan ümenâ-i şer‘-i enver ile gelip alâ-vukū‘ihî meclis-i şer‘a inhâ ve takrîr eylediği huzûr-ı âlîlerine i‘lâm olundu. Fî 28 Şevval sene 1162