Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 66 Hüküm no: 30 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem Nasraniye’nin bağ hîbesi konusunda hasımları ile muhakeme edilmesi Ma‘rûz, Sâdır olan fermân-ı âlîlerine imtisâlen işbu i‘lâma nazar olundukda bâ‘isetü’l-i‘lâm Maryem Nasrâniyenin hasımlarıyla mahâllinde hîbe nizâ‘ına dâir mürâfa‘alarının şer‘le rü’yet olunması bâbında emr-i âlîşân ısdârı niyâzından ibâret olup lâkin evvelâ i‘lâmda mezkûr kürûmu mülk bağın yeri ne sûretde olduğu ya‘ni yeri dahi mülk mü yâhûd arz-ı mîrî mi yâhûd arsa-i mevkūfe mi mübeyyen olmayıp ma‘a hâzâ eğer yeri arz-ı mîrî, ya mevkūf ise ibtidâ yerini sahib-i arz bâ-mütevellî izniyle mevhûbün-leh olan şahsa fâriğ olmadıkça hîbe-i sahîha olmaz ve menzilden hîbe olunan mahaller müfrez ve mu‘ayyen midir yâhûd müşâ‘ mıdır, îzâhan bilinemeyip hâlbuki şuyû‘-ı mukārenet ile hîbe bâtıl olur ve bağçeler de bağa mukayyeddir bu sûretde münâza‘un-fîh olan her ne ise ma‘rifet-i şer‘le mu‘âyene olunarak tarafeyn mahâllinde meclis-i şer‘-i şerîfde müfti ve ulemâ-i belde ve vücûh-ı ahâlî ile şer‘an huzûru şart olanlar hazır oldukları hâlde gadr ve himâyeden ârî hak ve adl üzere ber-nehc-i şer‘î mürâfa‘a olunup zımnında ne vechile hükm-i şer‘î lâhık olur ise ona göre iktizâsına bakılmak için keyfiyet mürâfa‘a ve sûret-i hükm-i şer‘îsini pâye-i serîr-i a‘lâya îzâhan i‘lâma mübâderet eylemesi bâbında Eğin nâibi es-Seyyid İsmail Efendi dâ‘îlerine hitâben emr-i celîlü’ş-şân ısdârı muvâfık-ı irâde-i seniyyeleri ise ol bâbda emr [ü] fermân. Fî 19 S sene [12]48