Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 345 Hüküm no: 421 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şekerci Mustafa b. Musa’nın Koska’daki dükkânını kapatıp Okçularbaşı’nda şekerci dükkânı açmasında bir mahzur bulunmadığı Bâ-mühr-i hazret-i efendi Ma‘rûz Şekerci esnâfının kethudâları el-Hâc Ali ve yiğitbaşıları İsmail ve ustalarından el-Hâc Abdurrahman ve İsmail Çelebi ve Usta Hüseyin ve el-Hâc Ali ve Mehmed Çelebi ve Hüseyin b. Ali ve sâir cerîdede mastûrü’l-esâmî kimesneler meclis-i şer‘de yine esnâf-ı mezkûre ustalarından sahib-i arzuhâl Mustafa b. Musa muvâcehesinde ez-kadîm hirfetimize mahsûs dekâkîn ma‘dûd ve müte‘ayyin ve mevcûd olan dekâkîni kâfî olmağla ziyâde dükkân küşâd ve ihdâs etmek bâ-fermân-ı âlî memnû‘ ve nizâmımız bu minvâl üzere cârî iken işbu mezbûr Mustafa Koska fırını kurbünde taht-ı icâresinde olan dükkândan mâ‘adâ Okçularbaşı’nda dahi bir dükkân istîcâr ve küşâd edip nizâm-ı kadîmimizin ihtilâline bâdî oldu deyü teşekkî eylediklerinde gıbbe’l-istintâk mezbûr Mustafa dahi nizâm-ı kadîmleri minvâl-i muharrer üzer[e] olduğunu ikrâr lâkin ben mukaddemâ Koska fırını kurbünde taht-ı icâremde olan dükkânı fesh-i akd-i icâre ile sahibine teslîm edip yerine Okçularbaşı’nda olan dükkânı istîcâr ve küşâd eyledim deyüp taht-ı icâresinde iki dükkân olduğunu inkâr ve mârrü’z-zikr Okçularbaşı’nda olan bir dükkândan mâ‘adâ küşâd etmemek üzere ta‘ahhüd etmeğin mezbûrûn ustalar dahi minvâl-i muharrer üzere râzılar olup bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 27 Şevval sene 1162