Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 346 Hüküm no: 423 Orijinal metin no: [55a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanyalı Yusuf b. Süleyman’ın boşandığı Zeyneb Hanım bt. Abdullah’ın yanında bulunan oğulları Süleyman Bey’in nafakasından kalan alacağını kefili olan Numan Çelebi b. Mehmed’in ödemesi Ma‘rûz Bahr-i Sefîd’de Girid cezîresinde medîne-i Hanya’da sâkin Yusuf b. Süleyman nâm kimesnenin zevce-i mutallakası olup sulbî sagīr oğlu Süleyman Bey’in vâlidesi ve hâzınesi mahmiye-i İstanbul’da Derviş Ali mahallesinde sâkine ve zâtı ta‘rîf-i şer‘î ile mu‘arrefe olan Zeyneb Hatun bt. Abdullah meclis-i şer‘-i enverde mezbûr Yusuf Bey’in sâbitü’l-vekâlesi ve sagīr-i mezbûrun ber-mantûk-ı hüccet-i şer‘iye yevmî altmış akçe nafaka-i mefrûzasına kefîli olan Galata Yağkapanı tüccârından el-Hâc Nu‘man Çelebi b. Hacı Mehmed muvâcehesinde sagīr-i mezbûra ber-mantûk-ı hüccet-i mezkûr on dört ayda bi’l-istidâne masrûfum olan cem‘an iki yüz on guruş nafakanın yüz yirmi yedi buçuk guruşunu kefîl-i mezbûr el-Hâc Nu‘man Çelebi bana def‘ ve teslîm ve seksen iki buçuk guruşu bâkī kalmağla taleb ederim deyü ba‘de’d-da‘vâ ve’s-suâl mezbûr el-Hâc Nu‘man cevâbında fi’l-vâki‘ kazıyye minvâl-i muharrer üzere olduğunu ikrâr ve i‘tirâf etmeğin mûcebiyle meblağ-ı bâkī-i mezkûr seksen iki buçuk guruşu dahi ber-mûceb-i kefâlet-i mezkûre müdde‘iye-i hâzıne-i mezkûreye edâ ve teslîm ile mezbûr el-Hâc Nu‘man’a tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî-selhi Şevval sene 1162