Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 347 Hüküm no: 424 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın, nafaka, mehir ve eşya bedellerinden olan alacak davasında sulh olduğu boşandığı kocası Yusuf Beşe b. Eyüb’ün sulh parasını ödemesi Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Âişe bt. Abdullah nâm hatun meclis-i şer‘-i enverde derûn-ı arzuhâlde mastûrü’l-ism zevc-i mutallıkı Yusuf Beşe b. Eyüb nâm kimesne ile terâfu‘larında zevci mezbûr Yusuf Beşe’den tesâddî ettiği elli guruş mehir ve iki buçuk aylık nafaka-i iddet-i bâkıyyesi olan beş guruş ile nakid otuz altı guruş ve mezbûrun yediyle Hüseyin Efendi nâm kimesneye ikrâz olunan otuz altı guruş ve ber-mantûk-ı defter-i müfredât bir top keten bezi ve sekiz gömlek ve sekiz uçkur ve altı yağlık ve iki âbdest makramesi ve bir yemenî yorgan ve bir yasdık ve üç kahve ibriği da‘vâsından bâ-vesâtet-i muslihîn zevci mezbûr Yusuf Beşe ile yüz yirmi beş guruşa sulh olup hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan herbiri âharın zimmetini ibrâ ve ıskāt eyleyip herbiri âharın vech-i muharrer üzere ibrâsını kabûl etmeğin bedel-i sulh olan meblağ-ı mezbûr yüz yirmi beş guruşu zevce-i mutallakası müdde‘iye-i mezbûre Âişe Hatun’a edâ ve teslîme mezbûr Yusuf Beşe’ye tenbîh olunduğu Bâb Mahkemesi’nden huzûr-ı âlîlerine i‘lâm olundu. Fî 2 min-Zilka‘de sene 1162