Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 348 Hüküm no: 426 Orijinal metin no: [55b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaplan v. Serkiz’in, Haçar v. Kirkor’da alacağına kefil olduğu iddiasıyla Kasber v. Agop’a açtığı davada haksız bulunarak davanın reddedildiği Ma‘rûz Derûn-ı arzuhâlde mastûrü’l-ism Kaplan v. Serkiz nâm zimmî meclis-i şer‘-i enverde sahib-i arzuhâl Kasber v. Agop nâm zimmî muvâcehesinde mesfûr Kasber arzuhâlinde ismi mezkûr Haçar v. Kirkor v. Haçar nâm zimmînin zimmetinde bâ-i‘lâm mahkûmun-bih doksan altı guruş hakkıma bi’l-emr ve’l-kabûl kefâlet-i sahîha ile kefîl olmağla li-ecli’l-kefâleti’l-mezkûre mesfûr Kasber’den meblağ-ı mezbûr doksan altı guruşu bi-hükmi’l-kefâle taleb ederim deyü da‘vâ ettikde ol dahi cevâbında kefâlet-i mezkûreyi ikrâr lâkin müdde‘î-i mersûm Kaplan târih-i i‘lâm senesi şehr-i Ramazan-ı şerîf’inin on beşinci günü medyûnu mezbûr Haçar’ı habs ettirdikde beni kefâlet-i mezkûreden çıkarıp meblağ-ı mezbûr doksan altı guruş mutâlebesinden zimmetim berî olmuşdur deyü ba‘de’d-def‘ ve’l-inkâr mesfûr Kasber def‘-i meşrûhunu lede’t-tezkiye makbûlü’ş-şehâde oldukları müte‘ayyin olan Sagobet v. Aslan ve Abraham v. Vartan zimmîler şehâdetleriyle muvâcehesinde vech-i şer‘î üzere isbât etmeğin mûcebiyle müdde‘î-i mersûm Kaplan kefâlet-i mezkûre mutâlebesiyle mesfûr Kasber’e bî-vech mu‘ârazadan men‘ olunduğu Bâb Mahkemesi’nden huzûr-ı âlîlerine i‘lâm olundu. Fî 3 Zilka‘de sene 1162