Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 66 Hüküm no: 31 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaağaç Gölhisar kazasına bağlı Dodurga köyündeki Bey Mescidi imametinin Ali Halîfe’ye tevcihi Ma‘rûz, Karaağaç Gölhisar kazâsına tâbi‘ Dodurga nâm karyede vâki‘ Bey Mescid-i şerîfinde yevmî nîm akçe vazîfe ile imâm olan Abdullah fevt olmağla mahlûlünden sulbî oğlu Molla İbrahim Bey yüz seksen yedi senesi Ramazanı’nda tevcîh olunup el-yevm üzerinde olduğu askerî rûznâmçesinden derkenâr olunmağla istid‘â ve derkenâra nazaran iktizâsı i‘lâm olunmak bâbında sâdır olan fermân-ı âlîşâna imtisâlen karye-i mezbûre ahâlîsinden bu esnâda Der-aliyye’ye gelen mühimmât-ı hiyâmiyeye me’mûr Asâkir-i Mansûre-i Muhammediye’den dördüncü yüzbaşının ikinci çavuşu Süleyman b. Mustafa ve sekizinci yüzbaşının başçavuşu Mahmud b. Yusuf nâm kimesneler huzûr-ı şer‘a celb ile keyfiyeti gereği gibi etrâfıyla suâl olundukda mezbûr Molla İbrahim bundan akdem fevt olup Yahya nâm bir nefer sulbî oğlunu terk etmiş ise de ol dahi bilâ-veled fevt olup imâmet-i mezkûre mahlûl ve mu‘attal kaldığını ve sahib-i arzuhâl merkūm Ali Halîfe muhtâr-ı cemâ‘at olduğunu herbiri alâ-tarîkı’ş-şehâde ba‘de’l-ihbâr ehliyet ve istihkākı dahi lede’l-imtihân nümâyân olmağın bu sûretde bi’n-nefs varıp edâ-yı hizmet eylemek ve hizmetinde tekâsül eder ise ref‘inden âhara tevcîh olunmak şartıyla imâmet-i mezkûr müteveffâ-yı mezbûrun mahlûlünden merkūm Ali Halîfe’ye tevcîh olunmak bâbında fermân hazret. Fî 11 S sene [12]48