Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 349 Hüküm no: 430 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galatalı Ermeni Sarraf Arakil v. Nehabet’in, Avanis v. Kirkor ile annesi Marta b. Karakaş’a açtığı alacak davasından vazgeçtiği Ma‘rûz Derûn-ı i‘lâmda mastûrü’l-ism Galatalı Sarrâf Arakil v. Nehabet nâm Ermeni meclis-i şer‘de derûn-ı i‘lâmda mezkûr Avanis v. Kirkor v. Ağya nâm Ermeni ile anası Marta bt. Karakaş nâm Nasrâniyenin zevci ve tarafından zikri âtî husûsu tasdîka vekîl olduğu Karagöz Kalfa v. Mardiros ve Abram v. Artin nâm zimmîler şehâdetleriyle sâbit olan mesfûr Kirkor muvâcehesinde derûn-ı i‘lâm-ı sâbıkda zikr ve beyân olunduğu vech üzere müvekkilân-ı mezbûrân Avanis ve anası Marta Nasrâniye’den tesâddî eylediğim yüz altmış altı buçuk guruşluk eşyâ da‘vâsından meccânen fâriğ olup husûs-ı mezkûra müte‘allika âmme-i da‘vâdan müvekkilân-ı mesfûrân Avanis zimmî anası Marta Nasrâniye ile zevci işbu vekîl-i mesfûr Kirkor zimmînin zimmetlerini ibrâ ve ıskāt eyledim dedikde mesfûr Kirkor zimmî dahi asâleten ve vekâleten ibrâ-i mezkûru ba‘de’l-kabûl bu vechile kat‘-ı nizâ‘ eyledikleri Mahkeme-i Bâb’dan <> mübâşirleri Mehmed Çavuş kulları ile huzûr-ı âlîlerine i‘lâm olundu. Fî 3 Zilka‘de sene 1162