Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 352 Hüküm no: 436 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sekyas v. Artin’in, Aleksan v. Avanis’e olan borcunu kefili Karabet v. Artin ile birlikte taksitler halinde ödemek üzere anlaştıkları Ma‘rûz İstanbul’da Altımermer kurbünde Uzuncaova nâm mahâlde mütemekkin Karabet v. Artin zimmî meclis-i şer‘de derûn-ı derkenârda mastûr Tophâne sükkânından Aleksan v. Avanis zimmî muvâcehesinde hâmiş-i derkenârda mastûr Sekyas v. Artin zimmî hazır olduğu hâlde mesfûr Sekyas zimmînin merkūm Aleksan zimmîye derûn-ı derkenârda zikrolunduğu üzere ber-mûceb-i i‘lâm-ı şer‘î cihet-i kefâletden mahkûmun-bih deyni olan dört yüz kırk guruşun edâsına bi’l-emr ve’l-kabûl kefâlet-i sahîha-i şer‘iye ile kefîl ve dâmin oldum dedikde mesfûrân Aleksan ve Sekyas zimmîler dahi ba‘de’t-tasdîk mesfûrân Sekyas ve Karabet zimmîler merkūm Aleksan muvâcehesinde meblağ-ı mezbûr dört yüz kırk guruşu merkūm Aleksan zimmîye hâlen ve def‘aten edâya iktidârımız yokdur deyü herbiri asâleten ve kefâleten tecîl ve taksîte tâlib olduklarında merkūm Aleksan dahi her otuz gün tamamında kendiye onar guruş verip târih-i i‘lâmdan kırk dört ay tamamına değin meblağ-ı mezkûru edâ etmek üzere tecîl ve taksît eylediğinde mesfûrân Karabet ve Sekyas’dan herbiri dahi ba‘de’l-kabûl meblağ-ı mukāssat-ı mezkûru müddet-i madrûbe tamamına değin merkūm Aleksan’a edâya ta‘ahhüd eyledikleri Mahkeme-i Bâb’dan huzûr-ı âlîlerine i‘lâm olundu. Fî 6 Zilka‘de sene 1162