Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 67 Hüküm no: 32 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devrekâni kazasına bağlı Tepecik köyü Camii imamı Seyyid Hüseyin Halîfe b. Ahmed ile İnceğiz köyü Camii hatîbi Seyyid Mehmed’in birbirlerinin vazifelerine karışmaması Ma‘rûz, Sâdır olan fermân-ı âlîlerine imtisâlen işbu arz ve derkenâra nazar olundukda Devrekâni kazâsı nâibi Hasan Efendi dâ‘îlerinin Südde-i sa‘âdete vârid olan bir kıt‘a arzı mefhûmundan kazâ-i mezbûra tâbi‘ Tepecik karyesinde vâki‘ mescid-i şerîfde yevmî bir akçe vazîfe ile imâm olan es-Seyyid Hüseyin Halîfe v. Ahmed hizmet-i lâzımesini edâ ve rü’yet etmek üzere kazâ-i mezbûra tâbi‘ İnceğiz karyesi câmi‘-i şerîfinin hatîbi olan es-Seyyid Mehmed nâm kimesne mescid-i mezbûr imâmının vazîfe-i mu‘ayyenesine bî-vech müdâhale etmekte olduğundan bahisle fuzûlî vâki‘ olan müdâhalesinin men‘i ve kadîmî üzere amel olunmak bâbında emr-i âlîşân sudûru istid‘â olunduğu derc ve iş‘âr kılınmış olmakdan nâşî kuyûda mürâca‘at olundukda kazâ-i mezbûra tâbi‘ Tepecik karyesi mescid-i şerîfin yevmî bir akçe vazîfe ile imâmet ciheti es-Seyyid Hüseyin b. Ahmed’in ve yine kazâ-i mezbûra tâbi‘ İnceğiz karyesinde vâki‘ Halil Bey Câmi‘-i şerîfinin vazîfe-i mu‘ayyene ile imâmet ve hitâbet cihetleri es-Seyyid Hâfız Mehmed b. es-Seyyid Mehmed’in ve câmi‘-i şerîf-i mezkûr tevliyeti dahi es-Seyyid Hüseyin b. es-Seyyid Halil’in üzerlerinde olduğu askerî rûznâmçesinden derkenâr ve mescid-i şerîf-i mezkûr [va]kfının tevliyet kaydı bulunmadığından ecvibesi rûznâmçe-i mezkûre Anadolu ve Haremeyn-i şerîfeyn ve Küçük Evkāf Muhâsebeleri ve Hâslar mukāta‘ası ve Nişân-ı hümâyûndan tahrîr olunmağın bu sûretde birbiri âharın vazîfe-i mu‘ayyenesine bî-vech müdâhaleden men‘ olunması bâbında emr-i âlîşân muvâfık-ı irâde-i aliyyeleri olur ise ol bâbda emr [ü] fermân. Fî 21 S sene [12]48