Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 356 Hüküm no: 444 Orijinal metin no: [57a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Mustafa’nın Çukadar Hacı Ali b. Mehmed’e ait Umurbey tımarının bedelini ödeyip iltizam etmiş iken tımarı tasarruf edemediğinden ödediği bedelin kendisine geri ödenmesi Bâ-mühr-i hazret-i efendi Ma‘rûz Sahib-i arzuhâl Ahmed Beşe b. Mustafa meclis-i şer‘de Çukadâr el-Hâc Ali b. Mehmed ile terâfu‘larında mezbûr el-Hâc Ali bâ-berat-ı âlîşân mutasarrıf olduğu İpsala kazâsında vâki‘ Umurbey nâm tımarını bin yüz elli beş senesine mahsûben yüz elli guruş bedel mukābelesinde bana ilzâm ve ben dahi iltizâm edip bedel-i mezkûru ber-vech-i peşîn malımdan Paşakapısı kurbünde çeşmelere muttasıl sarrâf dükkânında mezbûra tamamen vermişidim sene-i mezbûra mahsûben tımar-ı mezkûru zabt ve ta‘şîr benim için müyesser olmadığından mezbûra bedel olmak üzere medfû‘um olan yüz elli guruşu istirdâd ederim deyü ba‘de’d-da‘vâ ve’s-suâl mezbûr el-Hâc Ali sene-i mezbûra mahsûben müdde‘î-i mezbûra tımar-ı mezkûru ilzâmını ve bedel-i mezkûru kabzını bi’l-külliye inkâr etmekle müdde‘î-i merkūm müdde‘âsını lede’t-tezkiye adâletleri zâhir olan Ali Beşe b. Hasan ve İbrahim Beşe b. Halil şehâdetleriyle mezbûr el-Hâc Ali muvâcehesinde vech-i şer‘î üzere isbât etmeğin mûcebince meblağ-ı mezkûr yüz elli guruşun tamamen müdde‘î-i mezbûra edâ ve teslîm ile merkūm el-Hâc Ali ilzâm olunduğu huzûr-ı âlîlerine i‘lâm olundu. Fî 13 Zilka‘de sene 1162