Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 357 Hüküm no: 446 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan v. Uğurlu’nun kürk bedelinden kalan borcunu Mehmed Çelebi b. Ömer’e ödemesi [Ma‘rûz] Sahib-i arzuhâl Mehmed Çelebi b. Ömer meclis-i şer‘de Yuvan v. Uğurlu nâm zimmî ile terâfu‘larında mesfûr zimmetinde yedimden müşterâ ve makbûz sincab ve zerdevâ iki aded kürk semeninden altmış yedi guruş hakkım olup meblağ-ı mezkûrdan yirmi iki guruş bir rub‘u mesfûr Yuvan yedinden ahz ve istifâ ve bâkī kırk dört guruş üç rub‘ hakkım kalmağla taleb ederim deyü ba‘de’d-da‘vâ ve’s-suâl mersûm Yuvan müdde‘î-i mezbûra kürk bahâsından altmış yedi guruş deyni olduğunu ikrâr lâkin müdde‘î-i mezbûrun kabzını i‘tirâf eylediği yirmi iki guruş bir rub‘dan gayri kırk guruş dahi Şehzâdebaşı’nda dükkânımda bi’d-defa‘ât teslîm edip ancak zimmetimde dört guruş üç rub‘ kalmışdır deyü eylediği def‘ini beyâna kādir olmayıp bi’t-taleb mezbûr Mehmed Çelebi ba‘de’t-tahlîfi’ş-şer‘î mersûm Yuvan zimmî meblağ-ı mezkûr kırk dört guruş üç rub‘un müdde‘î-i mezbûra tamamen edâsıyla ilzâm olunduğu Mahkeme-i Bâb’dan ba‘de’t-tescîl huzûr-ı âlîlerine i‘lâm olundu bâkī fermân men-lehu’l-emrindir. Fî 17 min-Zilka‘de sene 1162