Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 358 Hüküm no: 447 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Ahmed’in, kendisine ait bazı mücevher ve eşyaların geri verilmesi talebiyle Osman Çavuş b. İbrahim’e açtığı davayı ispat edemediği Ma‘rûz Sahibe-i arzuhâl Hadîce bt. Ahmed meclis-i şer‘de sipâh çavuşlarından Osman Çavuş b. İbrahim muvâcehesinde mahmiye-i İstanbul’da Kürkçübaşı mahallesinde arzuhâlde mezkûre Rukiye Hatun’un menzilinde sâkine iken bundan akdem vefât eden Râbia nâm hatuna hayatında müddet-i medîde hizmet etmemle mezbûre Râbia’nın vârisi olan Mustafa Efendi müteveffiye-i mezbûrenin malından hizmetim mukābelesinde dokuz buçuk miskāl bir çift altın bileziği ile yirmi beş guruş kıymetli bir mücevher kuşağını verdikde ben dahi ba‘de’l-ahz mezbûre Rukiye Hatun’a bi-tarîkı’l-emâne vermişidim hâlâ mezbûr Osman Çavuş’un yedinde bulmağla taleb ederim deyü da‘vâ ol dahi cevâbında mezbûre Rukiye sâbıkā kayınanam olmağla hayatında sâir eşyâsıyla ma‘an mârrü’z-zikr bileziği bâ-hüccet-i şer‘iye otuz guruş semen-i medfû‘a iştirâ etmişidim deyü eşyâ-i mezkûreyi bana semen-i ma‘lûma bey‘ edip ve sâlifü’z-zikr mücevher kuşağı dahi mezbûre Rukiye ba‘de’l-vefât emîn-i beytü’l-mâl yedinden vaz‘-ı yedini ikrâr mâ‘adâyı ba‘de’l-inkâr mezbûre Hadîce ber-vech-i muharrer müdde‘âsını beyândan ızhâr-ı acz ile bi’t-taleb mezbûr Osman Çavuş ba‘de’t-tahlîfi’ş-şer‘î mezbûre Hadîce bilâ-beyyine bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 14 Zilka‘de sene 1162