Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 358 Hüküm no: 448 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zafireçe bt. Kostantin’in, kendisine ölünceye kadar bakmak şartıyla Todori v. Panayot’a verdiği vakıf evin geri verilmesi talebiyle açtığı davada haklı bulunduğundan evin kendisine iadesi Ma‘rûz Zafireçe bt. Kostantin nâm Nasrâniye şahsı ba‘de’t-ta‘rîfi’ş-şer‘î sahib-i arzuhâl Todori v. Panayot nâm zimmî ile bi’t-terâfu‘ meclis-i şer‘de Kara Çelebizâde Mehmed Efendi Vakfı’nın bi’l-fi‘il mütevellîsi olan es-Seyyid Mehmed Said Efendi tarafından vekîl-i şer‘îsi Çukadâr Ahmed b. Bayram hazır olduğu hâlde mesfûr Todori’nin zikri câ’î vakf-ı mezkûr müstagallâtından Fenerkapısı dâhilinde Abdi Subaşı mahallesinde vâki‘ ma‘lûmü’l-hudûd vakıf menzile bi’l-icâreteyn mutasarrıf olduğu mütehakkık olmağla terâfu‘larında menzil-i mezkûra bi’l-icâreteyn ben mutasarrıfe iken bundan akdem bin yüz altmış bir senesi Zilhicce’sinde beni ölünce görüp gözetmek şartıyla bâ-ma‘rifet-i mütevellî meccânen ferâğ etmişidim lâkin şart-ı mezkûr ile ferâğım fâsid olmağla menzil-i mezkûru <> bâ-re’y-i mütevellî tasarrufuma istirdâd ederim deyü ba‘de’d-da‘vâ ve’s-suâl mesfûr Todori mersûme Zafireçe menzil-i mezkûru kendiye bâ-ma‘rifet-i mütevellî şart-ı mezkûr ile ferâğ ettiğini ikrâr ancak bedel-i ferâğ olmak üzere mezbûreye dört yüz elli guruş vermişidim ben dahi medfû‘umu istirdâd ederim dedikde şart-ı mezkûr ile ferâğ-ı mezbûrun fesâdına binâen menzil-i mezkûrun bâ-re’y-i mütevellî mersûme Zafireçe tasarrufuna red ve teslîm ile ba‘de’t-tenbîh mersûme Zafireçe’ye mesfûr Todori’nin müdde‘âsından suâl olundukda bedel-i ferâğ-ı mezkûru ahzını inkârından mâ‘adâ işbu mesfûr Todori benim menzil-i mezkûru kendiye ferâğım bilâ-bedel meccânen olduğunu on beş gün mukaddem huzûr-ı Müslimînde ikrâr eyledi deyü ba‘de’d-def‘ ve’s-suâl mesfûr Todori ber-minvâl-i muharrer ikrârını i‘tirâf etmeğin olan evvelden [evvelden olan] müdde‘âsı tenâkuz olduğundan meşrû‘ olmamağla mersûme Zafireçe’ye bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 17 Zilka‘de sene 1162