Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 359 Hüküm no: 449 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koltukçu Mehmed Beşe b. Süleyman’ın, Asvador’da olan alacağının kefili Serkiz v. Haçok’un ödemesine yapılan tenbih Ma‘rûz Koltukçu tâifesinden Mehmed Beşe b. Süleyman meclis-i şer‘de Serkiz v. Haçok muvâcehesinde işbu hazır bi’l-meclis Asvador zimmî zimmetinde cihet-i karz-ı şer‘îden on dört guruş hakkımın bir guruşunu ba‘de’l-ahz târih-i i‘lâmdan yirmi bir gün mukaddem meblağ-ı bâkī-i mezkûrun edâsına mezbûr Serkiz bi’l-emr ve’l-kabûl kefâlet-i sahîha-i şer‘iye ile kefîl olmağla meblağ-ı mezkûr on üç guruşu mezbûr Serkiz zimmîden bi’l-hükmi’l-kefâle taleb ederim deyü ba‘de’d-da‘vâ ve’l-inkâr müdde‘î-i mezbûr Mehmed Beşe merkūm Serkiz’in kefâletini lede’t-tezkiye adâletleri zâhir olan Ömer Beşe b. el-Hâc Ahmed ve Ahmed Çelebi b. Mehmed şehâdetleriyle mezbûr Serkiz muvâcehesinde vech-i şer‘î üzere ba‘de’l-isbât hâzır-ı medyûn-ı mezbûr Asvador merkūm Mehmed Beşe muvâcehesinde deynim olan meblağ-ı bâkī-i mezkûr on üç guruşu târih-i mezkûrda beher sekiz gün tamamında kendiye yirmi beşer para verip yirmi altı haftada vermek üzere beni tecîl ve taksît eyledi deyü ba‘de’d-def‘ ve’l-inkâr medyûn-ı mezbûr ber-vech-i meşrûh def‘ini beyâna kādir olmayıp mezbûr Mehmed Beşe bi’t-taleb ba‘de’t-tahlîfi’ş-şer‘î mûcebiyle meblağ-ı bâkī-i mezkûr on üç guruşu müdde‘î-i mezbûr Mehmed Beşe’ye bi-hükmi’l-kefâle edâ ve teslîme kefîl-i merkūm Serkiz zimmîye tenbîh olunduğu Bâb’dan huzûr-ı âlîlerine i‘lâm olundu. Fî 16 Zilka‘de sene 1162