Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 67 Hüküm no: 33 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gerede kazasının Danişmendli köyündeki Savcıoğlu Camii imameti ile vakfın tevliyetinin Mehmed Salih’e tevcihi Ma‘rûz, Gerede kazâsında Danişmendli karyesinde vâki‘ Savcıoğlu nâm sahibü’l-hayrın binâ eylediği câmi‘-i şerîfin yevmî bir akçe vazîfe ile imâmet cihetinin rub‘ hissesi ve câmi‘-i mezbûr vakfının yevmî bir akçe vazîfe ile tevliyet cihetinin nısf hissesi es-Seyyid Mehmed b. Mehmed’in üzerinde olduğu askerî rûznâmçesinden derkenâr olunmağla meâl-i arz ve derkenâra nazar ve lede’t-tahkīk iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden Der-aliyye’de bulunan bî-garaz erbâb-ı vukūfdan Hâfız Ömer b. Mehmed ve Abdurrahman b. Abdullah nâm kimesneler meclis-i şer‘a celb ile keyfiyeti gereği gibi etrâfıyla suâl olundukda derûn-ı arzda tahrîr ve inhâ kılındığı üzere mezbûr es-Seyyid Mehmed’in kasr-ı yedi rızâsıyla olup merkūm Mehmed Salih dahi ehil [ve] muhtâr-ı cemâ‘at olduğunu herbiri alâ-tarîkı’ş-şehâde ihbâr etmeleriyle bu sûretde tekessür-i huddâm maddesinde edâ-yı hizmet fâidesi derkâr olduğuna nazaran bi’n-nefs imâmet etmek ve umûr-ı vakfı dahi kemâl-i sıdk u istikāmetle idâre eylemek ve eğer hizmet-i lâzımesinde tekâsül eder ise ref‘inden âhara tevcîh olunmak şartıyla ber-mûceb-i arz kasr-ı yedinden tevcîh olunmak bâbında emr [ü] fermân hazret-i veliyyü’l-emrindir. Fî 23 S sene [12]48