Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 360 Hüküm no: 451 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ali’nin dükkân kiracısı olan Kavukçu Süleyman b. Abdurrahman’ın uzun süredir ortada olmaması üzerine dükkâna girilip içindeki eşyaların tespit ve sayımı yapıldıktan sonra Hacı Ali’ye emanet verildiği ve dükkânın da kendisine teslim edildiği Ma‘rûz Sâdır olan fermân-ı âlîlerine imtisâlen kıbel-i şer‘-i enverden irsâl olunan es-Seyyid Ahmed Efendi İstanbul’da merhûm ve mağfûrun-leh Sultan Bâyezid Han Câmi‘-i şerîfi kurbünde vâki‘ sahib-i arzuhâl el-Hâc Ali’nin tasarrufunda olan dükkâna varıp ba‘de akdi’l-meclis-i şer‘ mezbûr el-Hâc Ali meclis-i ma‘kūd-ı mezkûrda zikrolunan dükkânda müşâhereten müste’cirim olan Kavukcu Süleyman b. Abdurrahman otuz iki buçuk aydan beri gaybet-i münkatı‘a ile gāib olup hayat ve memâtı ma‘lûm olmamağın dükkân-ı mezkûr mukaffel kalıp bana gadr olmağla dükkân-ı mezkûr feth ve derûnunda mevcûd eşyâsı ba‘de’t-tahrîr ve’d-defter yed-i emîne vaz‘ ve dükkân-ı mezkûr tahliye ve bana teslîm olunması matlûbumdur dedikde sûk-ı mezkûr ahâlîsinden mazbûtü’l-esâmî bî-garaz Müslimûn ihbârları ile fi’l-hakīka mezbûrun firâr ve gaybeti mütehakkık oldukdan sonra ahâlî-i sûk huzûrlarında dükkân-ı mezkûru ba‘de’l-feth derûnunda mevcûd altmış akçe kıymetli kavukluk şâlî parçaları ve altı yüz akçe kıymetli bir alaca kaftan ve doksan akçe kıymetli iki Mısır peşkiri ve yüz yirmi akçe kıymetli dört parça Şam alacası ve üç yüz altmış akçe kıymetli bir kırmızı kahve makramesi ve otuz [akçe] kıymetli hâre parçaları ve altmış akçe kıymetli bir parça asdar ve otuz akçe kıymetli bir mikdâr beyaz iplik ve otuz akçe kıymetli bir sîm yüzük ve otuz akçe kıymetli bir kahve ibriği ve altmış akçe kıymetli sekiz aded şem‘a ve yirmi dört akçe kıymetli bir siyah vezne ve altmış akçe kıymetli iki ütü ve yüz yirmi akçe kıymetli bir kutu içinde sirça taşlar ve bir mikdâr mercan ve otuz akçe kıymetli bir yağlık ve altmış akçe kıymetli ilmihâle müte‘allik bir kitâb ve yüz yirmi akçe kıymetli iki tahta sandık ve otuz akçe kıymetli bir mikdâr sof parçası ve on beş akçe kıymetli bir duhan çubuğu ve on beş akçe kıymetli bir kahve kutusu ve yüz yirmi akçe kıymetli bir köhne minder ve bir köhne yasdık ve altmış altı akçe kıymetli on bir aded kavuk kalıbı ve on beş akçe kıymetli bir câmeşûy kafesi ve on iki akçe kıymetli iki kaba hasır ve otuz akçe kıymetli bir Mısır hasırı ve altmış akçe kıymetli iki köhne ulemâ kavuğu ve bir köhne çuka kavuk ve otuz akçe kıymetli iki kuş kafesi ve altı akçe kıymetli bir duhan çubuğu ki min-haysü’l-mecmû‘ iki bin iki yüz seksen üç akçe kıymetli eşyâsını ba‘de’t-tahrîr gāib-i mezkûrun hâli mütebeyyin oluncaya değin emîn ve müstakīm olduğu Müslimûn-ı mezkûrûn haberleriyle müte‘ayyin olan dükkân sahibi olan mezbûr el-Hâc Ali kayyım nasb u ta‘yîn olunup eşyâ-i mezkûreyi mezbûr el-Hâc Ali’ye teslîm ve dükkân-ı mezkûru dahi tahliye birle kezâlik mezbûr el-Hâc Ali’ye teslîm eylediğini mevlânâ-yı mezbûr ümenâ-i şer‘le meclis-i şer‘a gelip inhâ eylediği Mahkeme-i Bâb’dan huzûr-ı âlîlerine i‘lâm olundu bâkī emr sultânımındır. Fî 16 min-Zilka‘de sene 1162